Ayera, un biaha mas, miles di turista crucero a ser ricibi pa mal holor y awa sushi

Ayera mainta centro di ciudad a ricibi tres barco crucero cu miles di turista cu a baha pa bishita Aruba, pero lastimamente e turistanan a ser ricibi pa mal holor y awa sushi. Manera ya casi a bira un custumber, dilanti di Royal Plaza atrobe awa sushi di rioolering a bin ariba causando molester y mal holor den e area.

No ta prome biaha cu esaki ta sucede. Na varios ocasion e mesun situacion ta presenta y ora cu awa yobe e molester sa bira pio. Pero ayera un cantidad grandi di turista crucero tabata na Aruba pa disfruta di e bunitesa di e isla, pero a encontra un sorpresa desagradabel na momento cu nan mester a soporta e mal holor y purba di evita pasa den e awa sushi.

Reportera di Bon Dia Aruba a combersa cu algun comerciante cu ta traha den e kiosconan dilanti di Royal Plaza pa puntra con nan ta wak e situacion aki.

Un di e comerciantenan a indica cu pa hopi aña caba nan ta keha di e situacion cu ta causa un molester grandi pa e area aki. E ta afecta nan benta, nan salud y mas cu claro e ta duna un mal impresion na e turistanan.

E comerciante a remarca cu e ta hopi mahos y no higienico cu turistanan mester cana den awa sushi, awa di pupu, y niun persona di gobierno ta busca un solucion.

El a sigui splica cu aunke nan ta pidi gobierno y departamento concerni pa haci algo pa yuda soluciona e situacion aki, nan no ta tende ningun feedback y no ta mira cambio tampoco den e problema.

Otro comerciante a indica cu e tin hopi aña trahando den e kiosco y e situacion ta mescos cu hopi aña atras, no tin mehoracion. El a splica cu e awa sushi cu ta bin di Royal Plaza ta core bay den e lama cu tin patras di e kiosconan.

E comerciante a menciona cu un preocupacion grandi cu e tin ta cu su mes a yega di mira con turistanan, sobre todo muchanan chikito, ta bay den e awa, den e lama, cu tin patras di e kiosconan pa baña of pa refresca nan mes.

Esaki, el a resalta, ta un peliger ya cu e turistanan por bira malo pa motibo di e awa sushi cu ta yega den e lama. El a señala cu no tin ningun borchi pa indica e turistanan pa no baña den e lama ey tampoco, cual ta algo necesario mirando con awa sushi ta bay den e awa ey.

El a menciona tambe cu antes tabatin un persona di gobierno cu tabata pasa haci e area dilanti e kicknan limpi pa bari tur sushi, pero for di algun tempo caba esaki no ta e caso y tur e sushedad cu tin dilanti e kiosconan tambe ta termina den e lama patras.

E comerciante, cu tin hopi aña trahando den e kiosco, a conta cu turistanan cu ta bishita Aruba pa hopi añas ta puntr’e pakico cada biaha cu nan bin nan ta wak e isla cada biaha mas sushi. El a indica cu e ta haya berguensa ora nan puntr’e cosnan asina y no sa kico pa contesta. El a destaca cu e ta purba mas bien di desvia y enfoca riba e partinan positivo y recorda nan pa disfruta di e playanan y e beyesa di e isla.

E mesun comerciante aki a splica cu mirando e gravedad di e situacion y e falta di accion di parti di gobierno y instancianan concerni, e mes a purba di cuminsa un proceso pa yega na un solucion. El a busca abogado y a hasta manda pregunta pa gobierno tocante e situacion, pero lamentablemente no a logra haya niun contesta y nada no a cambia tampoco.

Bon Dia Aruba a purba tuma contacto cu departamento di DOW pa puntra tocante e situacion, pero mensahe di e mashin di telefon tabata indica cu pa motibo di problema tecnico e yamada no por a ser procesa.

A purba tambe tuma contacto cu DIP, pero despues di varios intento di yamada, ningun hende a contesta.

Bon Dia Aruba a tuma contacto cu prome minister Evelyn Wever-Croes, ken tambe ta encarga di e cartera di Infrastructura, y a puntra si no tin un plan na luga pa casonan asina (urgente) pa deshaci di e awa sushi rapidamente mirando e cantidad di turista cu a bishita e isla. A puntra tambe si ta trahando riba un plan pa soluciona e problema aki definitivamente, ya cu tin hopi aña caba causando molester, y por ultimo a puntra cual departamento ta encarga aworaki cu e sistema di rioolering, si ta DOW mes of si esaki a pasa pa otro departamento.

Prome minister a indica cu e problema di riolering den LG Smith Boulevard ta uno hopi bieuw pero cu ta hayando atencion di AWSS, cu recientemente a tuma e red di sistema di riolering di Aruba for di DOW.

El a splica cu e diseño di e sistema aki ta ser yama un “Gemengd systeem”, caminda cu tanto awa di yobida y awa di riool cu ta bin for di Aeropuerto na Sabana Berde, Dakota y Oranjestad topa otro riba e mesun liña di e sistema. Durante hopi decadas di desaroyo economico hopi mas sector y instancia a uni nan mes riba e sistema aki cual a limita su capacidad pa funciona debidamente.

Prome minister a sigui splica cu por ehempel na momento cu tin un storing cu “pompgemaal” of tin verstopping di vet (hende ta tira vet den e sistema y ta stroba e sistema di traha) esaki ta sali afo dilanti Royal Plaza of otro caminda den e area. Y durante yobida e problema ta bira aun mas grandi.

Gobierno a duna instruccion pa bin cu un solucion structural pa e situacion aki mas pronto posibel. Mientrastanto AWSS mester traha riba un plan pa ora cu e problema aki manifesta, mester troubleshoot e storing mes ora y tuma medida nan corectivo pa por deshaci di e awa sushi pa evita molester.

El a resalta cu Gobierno y AWSS tin un plan pa separa e liña di riool for di e liña di awa di yobida pa asina aumenta e capacidad den e liña. Esey kiermen cu pronto lo mester bay traha riba e infrastructura di LG Smith Boulevard pa instala dos tuberia nobo y asina soluciona e problema aki na un forma mas structural.

El a agrega cu prome mester a traha e espacio financiero pa despues por haci e inversionnan grandi aki. Desde juli1, 2024 AWSS ta encarga cu e “Rioolstelsel” di Aruba. Pues ta apenas nan a tuma over e sistemanan di riool, nan no por a inventarisa y soluciona tur problema ainda. Sinembargo na momento cu e problema aki y otronan cu a surgi cuminsa demanda atencion, e personal di AWSS a lo atende y troubleshoot e situacionnan cu presenta.

Por ultimo el a haci apelacion na comunidad en general pa na momento cu nota cu tin problema cu rioolering, tuma contacto cu AWSS na telefon; 280800 of bishita e website www.awss.aw.