Prome Minister, Evelyn Wever-Croes a habri e sesion di tratamento di presupuesto su nota di cambio, reflehando riba e situacion y cambio cu coronavirus of Covid- 19 a trece cune den nos bida y actividad diario.

Igualmente riba e nota di cambio debi cu e situacion di Covid-19, ta haci cu e presupuesto aki ta uno pa atende cu e crisis aki. E no ta mas e presupuesto cu mester produci un surplus di mas cu 25 miyon florin a base di protocol firma cu Hulanda na aña 2018. Un di e prome cambio tin di haci cu full e reforma fiscal a wordo laga afo.

Mas bien, gobierno ta presenta un plan di contingencia financiero-economico cu un pakete di 1.3 biyon florin pa atende cu e emergencia cu e Covid-19 ta ocasiona na Aruba. Un cifra considerabel cu -segun fraccion di AVP- mester a atende cu e responsabilidad di control cu nan mester eherce como parlamentario, a pesar di e urgencia cu esaki ta demanda.

Premier Wever-Croes a bisa cu prome cu cos cu nan a haci pa bin cu e plan aki, ta inventarisa kico ta e magnitud di e crisis y tambe e necesidadnan cu nos pais mester pa por enfrenta esaki.

Presta placa

Pais Aruba lo mester presta for di mercado internacional placa y Hulanda ta dispuesto pa yuda den esaki. E lo ta conhuntamente cu Corsou y St. Maarten pa purba haya interes mas abao. Diabierna awor el a anuncia cu lo tin un reunion extraordinario di conseho di minister pa mira e caminda pa presta e suma grandi aki.

El a pidi pa parlamento por aproba e presupuesto aki pa asina logra e fiansa aki pa cuminsa “reconstrui nos pais,” y asina por brinda asistencia social pa esunnan mas vulnerabel di nos comunidad. “Ya tin centenares di persona cu a bati na porta di gobierno,” el a bisa.

El a expresa palabra di gratitud inmenso na parlamento henter pa compronde e situacion y duna cooperacion pa por yega na e punto di por presta e placa pa atende cu e situacion di crisis aki.

Igualmente e prome mandatario a solicita via un carta pa parlamento pa nan bay di acuerdo cu un parti di e fondo cu nan a inclui den e presupuesto 2018 pa atende exclusivamente cu e crisis di Venezuela, tambe por wordo uza pa atende cu e crisis actual di Covid-19. E destinacion di e placa aki lo ta pa cumpra y tin suficiente material y ekipo disponibel pa atende cu e prome necesidad di e crisis aki.

El a laga sa cu e reconstruccion aki ta tuma sacrificio tanto di gobierno cu lo baha su gasto, pero tambe di e sector priva, hotelero y trahadonan. El a bisa: “Tambe nos a haci un ehercicio pa mira con gobierno ta baha su gastonan. Y e resto nos ta bay presta.”

E suma di 1.3 biyon florin -segun e prome mandatario- ta entre otro pa trece alivio cerca e trahadonan cu a perde entrada pa nan por haya asistencia financiero mensual di 950 florin di gobierno.

Pero tambe alivio pa comerciantenan y doño di trabou cu lo haya sosten financiero tambe. Tambe pa fortifica e fondo di AOV pa atende cu nos pensionadonan y AZV pa e gastonan medico por wordo cubri. Igualmente inversion lo wordo haci den nos finanzas y economia pa nos por lanta bek.

El a duna un relato di e 12 caso positivo di Covid-19 raporta te ayera merdia. Ademas di 833 persona den cuarentena. El a menciona cu di e cifra aki 88 di nan tabatin contacto cu un persona cu a wordo confirma di tin e virus. Mientras cu 745 persona den cuarentena ta hendenan cu a bin for di exterior, el a informa.

El a referi na e diferente medidanan di conocemento publico cu gobierno adopta pa evita cu e virus aki lo sigui plama na Aruba. El a referi cu den e crisis aki cu apenas a caba di cuminsa rond di e Covid-19, tambe problema social y violencia domestico a aumenta. Gobierno a dicidi cu nan lo incentiva e social crisis plan y practicamente nan lo bin cu ‘un crisis plan den e crisis plan aki.’

El a probecha pa haci un reconocimento na esnan cu ta traha den nos cuido di salud pa nan sacrificio grandi pa cuida di otro den un estado di crisis serio.