“Gabinete Wever-Croes contrario na gobierno anterior, a pone integridad central den e programa.” Premier Evelyn Wever-Croes a anuncia un vision ambicioso pa logra bon gobernacion y mas transparencia den gobernacion.
Den un comunicado di prensa, entre otro a anuncia cu Bureau Integriteit Aruba lo percura pa mas conscientisacion riba e tema, y caminda hendenan por yama pa raporta casonan cu no ta integro. Integriteitskamer cu mester controla destahonan publico di Gobierno, entre otro door di e-Procurement. Corporate Governance Code, cu ta stipula reglanan di integridad pa companianan estatal y priva.
Aparte di esey ta traha tambe riba Fortificacion di Institutonan di Estado pa haci e control necesario riba funcionamento di Gobierno, manera Parlamento, Raad van Advies, Algemene Rekenkamer. Tambe lo introduci e Ombudsman, defensor di pueblo cu lo atende kehonan di ciudadanonan.
E vision aki, segun e comunicado, lo permiti Aruba Ratifica e tratado di Nacionnan Uni contra corupcion den prome mita di 2020. Den Caribe Hulandes, Aruba lo ta e prome pa ratifica e tratado aki. Mientras tanto Aruba a cera aliansanan cu UNDP y OECD pa crea un governance hub, poniendo asina integridad y bon gobernacion central, no solamente cu palabra pero cu hecho.
