Ayera den oranan di atardi Gobierno demisionario y partido RAIZ a firma acuerdo di gobernacion

Prome minister demisionario Evelyn wever croes a hiba palabra na Nicolas Store unda cu a firma e acuerdo di gobernacion. Segun e mandatario demicionario a scoge San Nicolas debi cu e exito di Aruba den e tempo nos dilanti cu ta e 4 añanan nos dilanti den e gobierno nobo a bay wordo determina pa con lihe nos por bay recupera economicamente.

E recuperacion economico di Aruba ta bay depende hopi di con lihe San Nicolas ta recupera economicamente, y esey ta determina tambe e desaroyo economico di Aruba. San Nicolas mester di atencion y e lo haya e atencion debido di e gobierno nobo di Aruba.

A firma e acuerdo di gobernacion pero ainda nos no ta cla, pero ta un paso hopi mas cerca pa anuncia e siguiente gobierno. E acuerdo cu e keda firma ta e base den liñanan grandi di kico partido MEP y partido RAIZ ta bay enfoca den e 4 añanan nos dilanti.

Despues di e firmamento falta pa finalisa reparticion di carteranan entre partido MEP y partido Raiz y despues ainda pa apunta y propone candidatonan pa minister pa cada un di e partidonan.

Prome minister demisionario ta gradici tur e 101 stakeholdersnan cu a reuni cu nan den e ultimo simannan. Actualmente ta den e di 5 siman bayendo pa 6 siman den formacion di gobernacion. E informacion cu a bin for di e stakeholdersnan a forma e base pa awe e futuro gobierno ta firmando e acuerdo aki.

Importante ta cu mas scucha kico ta biba den comunidad mas miho por hiba e pais padilanti. Nunca ta dimas pa scucha loke ta wordo sinti den comunidad como pueblo. E prome compromiso cu lo haci ta cu prome cu fin di october cada un minister ta bay duna su aporte pa yega na un programa di gobernacion mas detaya y cu lo keda presenta na parlamento pa keda aproba den conseho di minister y despues pa e keda presenta na parlamento pa fin di october.

E prome capitulo den e plan di gobernacion ta papia di integridad y bon gobernacion, esaki ta encera pa finalisa e trabaonan cu lo cuminsa cu nan, pero principalmente sementa e esfuersonan pa sigui e liña di integridad y bon gobernacion pa nan bira un parti normal ,usual,natural den tur gobernacion di awo padilanti.

Esaki no ta depende di un solo partido, pero e ta wordo sementa y asina Aruba por garantisa bon gobernacion den futuro. E di dos punto ta e derechonan social, cuido di adulto mayor , nos muchanan y nos hobennan, engenera e bienestar di e ser humano. Prome minister demisionario Evelyn Wever Croes ta duna di conoce cu na e punto aki kier para keto. Pa crea mas trankilidad y traha mas riba e felicidad di e ciudadano. Pone atencion na e problemanan social, asistencia na adultonan y tambe un maneho dirigi pa guia nos muchanan y hobennan pa por brinda nan mas oportunidad pa bay dilanti.

E di tres punto ta finansas publico paso sin placa no por haci nada. Lo continua cu un maneho financiero solido y responsabel manera cu a hasie prome cu pandemia pa asina sigura cu Aruba tin un luz atrobe, esaki sigur mester cana hunto cu e palabracionnan cu Aruba tin cu Hulanda pa asina Aruba tin un finansas publico sostenibel y cuminsa paga e debe cu Aruba tin.

E di 4 punto ta economia, nos economia lo yuda Aruba sali padilanti unda cu e desaroyo economico lo yuda pa Aruba paga su debenan bek y tambe bienestar pa cada ciudadano. lo haci esfuersonan pa facilita inversion unda cu e masterplan lo indica e rumbo di nos pais. Importacion for di region mes y na un miho prijs. Tambe lo duna apoyo y sosten na sector priva .

E di 5 punto ta husticia cu mester tin siguridad y proteccion y loke cu sigur ta compromete nos mes ta pa hunto cu nos partnernan traha riba prevencion y inverti den nos cuerponan pa asina por bringa e problemanan cu tin di insiguridad riba nos pais. Pa loke ta trata e maneho di inmigracion e enfoke ta pa combati ilegalidad mas tanto cu ta posibel y intensifica e siguridad di nos frontera , evita violacion di derechonan humano engeneral.

E di 6 punto ta infrastructura unda cu e desaroyo sostenibel unda lo bay traha riba procesonan transparente husto pa cada ciudadano pa loke ta trata maneho di tereno, esaki ta encera tambe cu mester busca un balance entre desaroyo economico un banda y proteccion di naturalesa y medio ambiente na e otro banda.

E di 7 punto enseñansa cultura y deporte, pa cuminsa lo trece trankilidad den area di enseñansa unda cu lo trece innovacion den e sistema di enseñansa pa asina prepara nos hobennan pa nan ta miho prepara pa contribui na nos economia den futuro. E plan nacional di enseñansa 2030 lo sirbi como base, pero tambe lo enfoca riba enseñansa como segundo oportunidad.

E di 8 punto ta e cuido medico di calidad halto y sostenibel caminda ta considera cuido medico un derecho civico y e obhetivo ta pa preveni malesa y prolonga bida di cada ciudadano, pesey mes mester enfoca riba prevencion y fortifica nos cuido medico den tur area.

E di 9 punto ta e relacionnan den reino unda cu ta para pa bon cooperacion cu tur e islanan den reino y pa activamente busca oportunidad di cooperacion cu ta beneficia tur ciudadanonan di reino.

E di 10 punto lo traha riba un procedura pa resolve eventual diferencia di opinion, esaki ta un punto cu e gobierno ultimo tabatin experiencia cu ne den e prome coalicion cu partido MEP a traha cu ne y tabata semper hopi importante pa tin un palabracion y cu si yega un momento cu tin puntonan cu no por yega na acuerdo cu ne y no tin un solucion poni den e acuerdonan pa firma e ora lo tin un comision di mediacion pa por atende na un manera responsabel y di adulto den cualkier diferencia di opinion cu por tin.

Prome minister demicionario Evelyn Wever Croes ta duna di conoce cu e acuerdo di gobernacion aki ta sali di punto di bista despues di e firmamento di ayera lo tin un maximo di un siman mas tin mester pa keda cla pa por entrega na gobernador tur documentacion cu e la pidi y pa asina por huramenta e minister nan y asina pa fin di october cada minister entrega su contribucion di nan programa di gobernacion .