Segun resumen di Departamento di Salubridad Publico DVG di e cifranan di pandemia di Covid-19, ayera a registra dos caso mas di fayecido pa e malesa.
Cu e dos fayecido aki, e cantidad di morto pa Covid-19 a aumenta na 94. Condolencia na famia y sernan keri di e fayecidonan.
Igualmente DVG a informa cu a registra 52 caso nobo di e malesa causa pa e virus SARS-CoV-2. Di e 52 caso nobo, 6 no ta residente di Aruba. Ademas, DVG a informa cu 70 persona a recupera. E tasa di positividad (‘positivity rate’) entre residentenan ayera tabata 22%, mustrando asina un reduccion.
E cantidad total di test ehecuta ayera na e diferente localidadnan na Aruba, entre otro laboratorio di hospital, laboratorionan priva y na aeropuerto, ta 547 test.
Di su banda, Hospital Dr. Horacio Oduber a informa cu tin un total di 44 persona interna. Di esakinan, 17 ta den Unidad di Cuido Intensivo mientras cu 27 ta isola riba unidad general di covid.
