Segun resumen di Departamento di Salubridad Publico (DVG) pa loke ta casonan di coronavirus na Aruba, ayera a cera cu 164 caso activo.
Den e resumen diario cu e departamento ta publica riba nan pagina di Facebook y a traves di medionan di comunicacion, ayera a registra un total di 18 caso nobo di Covid-19 na Aruba. Di esakinan, 12 ta residente y seis no ta residente. Ademas a reporta cu 16 persona a recupera di e malesa.
Segun e datonan publica pa DVG ayera a realisa 791 test, pa loke e tasa di positividad (‘positivity rate’) local ayera tabata di 23%. Esaki a keda den e averahe semanal, ya cu e averahe di tasa di positividad siman pasa, a base semanal, tabata di 18 porciento, cu e tasa mas halto na 34 porciento diahuebs ultimo y e tasa mas abao na 9 porciento dialuna ultimo.
Mientras tanto e cantidad di fayecido relaciona cu Covid-19 ta na 49. Palabra di condolencia ta bay na famia y conocidonan di e fayecidonan.
Di su banda, Hospital Dr. Horacio Oduber a informa cu tin un total di seis persona interna. Di esakinan, dos ta den Unidad di Cuido Intensivo (ICU) y cuatro ta isola riba piso general.
