Ayera atardi e di dos grupo di studiantenan cu ta bay Hulanda a sali for di Aeropuerto Internacional Reina Beatrix di Aruba pa asina nan por continua cu nan studionan avansa na exterior pa un tempo di entre 3 pa cuatro aña.

Den un entrevista na Bon Dia Aruba, Sharline Croes Dubero, coordinador di afdeling studiefaciliteinten di Departamento di Enseñansa di Aruba (DEA) el a informa cu diadomingo ya caba 75 studiante a bay riba e vuelo y ayera dialuna tabatin 90 studiante, Croes tambe a señala cu mañan 4 di augustus lo tin un otro vuelo pa Hulanda caminda lo tin 90 studiante mas.

“Den total ta 431 studiante cu ta bayendo Hulanda e aña aki di cual 225 a bay organisa y e resto nan a bay riba nan mes of ta bayendo despues di dia 4 tambe” Croes a sigura.

Igualmente, el a laga di conoce cu e proceso di e aña aki pa studiantenan tabatin diferente reto di loke ta trata e peticionnan pa hobennan sigui nan studionan na exterior, el a declara cu e biaha aki nan tabatin e dobel di peticionnan compara cu aña pasa, esey tabatin di haber cu e hecho cu tabatin e situacion di e pandemia di Covid-19 y hopi studiante a opta pa no biaha aña pasa pero e aña aki si nan a dicidi di biaha.

Ta p’esey cu e aña aki ta mas grandi cu otro añanan anterior y esaki a trece logisticamente tambe pa Hulanda su organisacion hopi reto pero “nan a deal cun’e y e ta bayendo bon”, segun Croes a comenta.

Di parti di Departamento di Enseñansa, Croes a expresa cu nan a purba di duna pa studiantenan mas informacion posibel door di haci webinars y splica nan con e proceso ta.

Tin diferente ramo cu nan a scoge pa studia como por ehemplo internacional business, economia, marketing, general study, entre otro.

Rishander Tromp un di studiantenan cu a bay ayera a comenta pa reportero di Bon Dia Aruba cu e ta bay studia scheikunde na Nijmegen, el a declara cu e bachelor primeramente ta tres aña pero e ta depende di e master cu por ta un aña mas.

Manera ta conoci studiantenan ta bay nan so y laga nan famia na Aruba, pa esaki Tromp a indica cu esey por nifica un situacion un tiki duro sin nan mayornan vooral den temporada di Pasco pero awendia ta existi e tecnologia y smartphone na unda nan por conecta cu tur e famia, igualmente el a sigura cu “bo ta sinti toch un tristesa ora bo ta bay”.

Tambe el a bisa cu el a scoge pa studia e ramo aki pa motibo cu e semper tabata bon den scheikunde na scol y p’esey el a dicidi di sigui cune pasobra “esey ta unico cos cu mi a wak mi mes den futuro”, el a bisa.

Mama di Tromp a señala cu e ta espera pa su yiu haci su futuro mescos cu el a haci un dia 2 di augustus pero 30 aña pasa y cu e sa basta bon kico su yiu ta pasando aden “mi ta spera cu tur cos lo bay bon cune, e ta un aventura grandi p’e”.

Ademas, Cristian Erasmus cu tambe a comparti su experiencia aki cu Bon Dia Aruba a señala cu ora e tabata den tempo di HAVO el a wak kico mas o menos e tabata gusta den e vaaknan y e ora ey el a ripara cu e ta gusta natuurkunde y wiskunde hopi, door di esey ayera atardi el a bay Hulanda pa studia Mecanical Enginering den e cuatro añanan cu ta bini.

“Esaki ta un proceso un tiki duro y fastioso pero na mesun momento mi ta sinti bon pasobra e ta bay ta pa mi mesun bon y pa mi futuro, prome biaha mi ta bay sin mi tata y sin mi mama pero mi ta kere cu mi mester custuma cu e ta bay pasa”, el a afirma.

Asina mes, Joshua van der Biezen a comparti pa Bon Dia Aruba cu e ta bay studia Finance and Control International na Breda y cu tambe tin un duracion di cuatro aña caminda cu segun e mes a expresa e ta un experiencia nobo cu un universidad, haciendo cosnan nobo, e ta expect cu lo haya hopi experiencianan unico y cu cosnan cu e no por haci na Aruba.

Tambe, el a manifesta cu pa loke tin di haber cu camber, banco y gobierno mes, esey ta regla caba y cu su famia tabata sa cu tin algun studiantenan cu ta bay afo pa diferente universidadnan y esey tabata algo cu semper su famia tabata expect di dje, “pero semper bo ta bira un tiki tristo di laga bo famia, pero e ta bay”, el a finalisa.

Di parti di ekipo di redaccion di Bon Dia Aruba nos ta desea hopi exito pa studiantenan cu ta cuminsa un bida nobo yen di experiencianan pa nan por bira profesionalnan den futuro.