Recientemente riba un pagina di Facebook pa turista cu a yega di bishita of cu ta bay bishita Aruba, tabatin un publicacion, cu a ser elimina, den cual un participante anonimo a publica algun potret di plas di awa indicando un posibel overflow di awa sushi di rioleering.
Inmediatamente e publicacion a capta atencion di varios usuario. E plas di awa aki tabata banda di hotel Barcelo y no tabata sigur si tabata trata di awa sushi di rioolering.
Bon Dia Aruba a tuma contacto cu Aruba Wastewater Sustainaible Solutions (AWSS), ken cu ta e compania cu desde 1 di juli ta encarga cu e red di procesamento di awa di rioolering como tambe e plantanan di RWZI.
A puntra e representante di AWSS si e overflow di awa aki tabata trata di awa sushi di riolering, si ta un situacion cu ta andando, cu nan ta atendiendo of kico ta e status di e situacion.
E representante a splica cu no ta trata di un overflow di awa sushi di e rioolering. El a sigui splica cu e tuberia di rioolering di AWSS no ta conecta na e tubo ey di e hotel. Segun el a indica un trahado di e compania a bay mira kico tabata e situacion pa determina si tabata trata di un overflow di awa sushi di rioolering, pero a bin constata cu esey no ta e caso.
E representante di AWSS no tabata sigur exactamente kico a pasa ni kico tabata e situacion, pero el indica cu di loke nan por a mira tabata trata talbes di awa di pool posiblemente, ya cu tabatin santo den esaki tambe. Pero esaki no ta algo cu ta confirma.
