Diamars dia 27 di augustus ultimo, colega, contratistanan di WEB Aruba y representantenan di compania Accelleron a bini hunto pa finalisa y celebra e proyecto Turbo LifecycleCare.

Director di WEB, Alfredo Koolman y di CEO Sr. Ihab Hlayel di ACCELLERON, a finalisa oficialmente e prome ‘refurbish’ di un Turbo Cartridge (TC), turbocartridge ta un piesa critico pa funcionamento eficiente y confiabel di motornan RECIP.

E acuerdo cu ACCELLERON ta ofrece e oportunidad pa ehecuta trabounan di mantencion y reparacion di TCnan na Aruba, door di expertonan di ACCELLERON y cu sosten di empleadonan di WEB. Esaki ta contribui na un operacion confiabel, eficiente y continuo.

Casi 10 luna pasa, dia 08 di november 2023, a tuma luga e firmamento di e acuerdo cu ACCELLERON pa percura e disponibilidad di piesa y servicio esencial pa e ‘Turbo Cartridges’ pa un termino di 10 aña.

E acuerdo cu ACCELLERON ta percura cu e piesanan critico ta disponibel. Esaki lo haci mas cortico e tempo pa haci reparacionnan riba e motornan RECIP. Importante pa menciona ta cu e acuerdo aki ta ofrece e oportunidad tambe pa ehecuta trabounan di mantencion y reparacion na Aruba en bes di den exterior, door di expertonan di ACCELLERON y cu sosten di empleadonan di WEB, locual ta bentahoso pa un operacion confiabel, eficiente y continuo. Coleganan di WEB a haya e oportunidad di sigui cursonan pa desaroya nan conocemento di entre otro, turbochargers.

Desde aña 2006 WEB ta manda TC bay service den exterior, cual ta trece hopi reto. Tin hopi exigencia principalmente debi na e peso y e hecho cu carga por sali di Aruba solamente cu Air freight. Ta obvio cu gasto di carga y flexibilidad den operacion a pone cu a cuminsa sondea e opcionnan di tin e TCnan semper on-site, cla pa uso. Desde cu e esfuersonan a start na 2019 te cu awor, a tuma casi 5 aña pa logra pero awe e ta un realidad.

E shop on-site ta habri un porta pa mecaniconan yiunan di tera ta mas prepara pa gana experiencia den kita turbo for di motor, pero tambe pa siña con ta haci servicio un turbo for di comienso te final. Cu e shop y asistencia di Accelleron on-site, empleadonan di Onderhoud Centrale di WEB tin e oportunidad di observa mas di cerca e “cause and effect” cu tin riba turbo cartridges motornan di WEB. Asina lo por traha hunto cu ACCELLERON pa averigua con por minimalisa daño na TCnan door di factornan exterior.

Pa awe mainta for di 10or di mainta te cu 12 di merdia, WEB a anuncia un ceremonia cu Bredenoord pa loke ta trata “Temporary 20MW Power Supply.”