Algun siman atras nos a publica un relato riba un proyecto di tres aña cu Casa Cuna a cuminsa pa eleva profesionalismo y nan servicio. E fundacion a subraya na Bon Dia cu mirando e cantidad di muchanan y diferente traumanan mas complica cu e muchanan ta haya nan mes aden, a opta cu mester concentra na hisa calidad di profesionalismo interno. Den cuadro cu esaki, nos a combersa cu Marieke van der Linden, kende ta un psicologo y coordinador pedagogico na Casa Cuna, pa elabora un poco mas riba e tipo di traumanan aki y con ta trata cu nan.
Manera nos a trece dilanti, Casa Cuna Progreso ta un internaat cu ta brinda ayudo 24/7 na muchanan entre 0-8 aña pa 60 aña caba na Aruba. Nan meta ta pa cuida y guia e muchanan cu pa un of otro motibo no por biba na cas por medio di abuso fisico, sexual of negligencia. No tin un tipo di trauma cu ta resalta of cu nan ta wak mas cu otronan na Casa Cuna, pero ta depende di e situacionnan cu e muchanan ta bin segun e psicologo ta splica nos. Ora cu muchanan ta bini for di un situacion caminda tin hopi violencia na cas por ehempel, nan ta lanta cu e pensamento cu tur cos ta wordo soluciona cu violencia segun sra. van der Linden. Esey den e casonan aki ta bira nan manera pa sobrevivi. Anto esaki seguramente ta uno cu ta bini hopi dilanti. “Antes ora cu bo ta analisa e hobennan problematico, nos tabata wak e trauma anto no ta tur ora crea e laso/conexion cu nan tempo mas jong. Awor nos sa cu por ehempel e prome 1001 dia di un mucha for di e concepcion ta asina importante. Tin hopi cos cu ta wordo imprimi na e momentonan ey,” sra. van der Linden ta bisa. Mundo a bira mas complica e temponan aki tambe pues tin mas traumanan ta bin dilanti naturalmente, pero awendia tambe tin mas manera pa midi esakinan segun e psicologo ta splica Bon Dia.
Psicologonan riba mesun liña
Den algun entrevistanan anterior cu Bon Dia a publica di combersacionnan cu entre otro expertonan den psicologia of cuido mental, nos a tuma nota cu mayoria ta riba mesun liña. Nan ta papia riba e importancia di analisa e origen of prome añanan di un persona su bida pa por compronde e manifestacion di cierto traumanan y for di unda nan a bin. Sra. van der Linden ta atende cu e muchanan na Casa Cuna y coordina tur e encuentronan cu nan tin. Nan ta haci intake ora cu muchanan ta wordo recomenda por medio di Voogdijraad of departamento di Asuntonan Social. Casa Cuna tin un team di tres hende hunto cu sra. van der Linden cu ta consisti di B. van der Pol, un psicologo y IMH Specialist (Infant Mental Health) cu ta traha hunto cu Casa Cuna tur diahuebs, y un ortopedagogo, M. van der Sloot cu hopi experiencia den e tema aki. Nan ta traha entre otro pa wak cada mucha separa riba kico nan tin y kico nan tin mester. E idea di un internado ta pa ora cu un mucha tin problema y no por keda cas, pa e haya cuido y despues por sali bek. Pero e psicologo nan aki ultimo tempo ta haciendo hopi mas trabao hunto cu e famianan mes mas cu ta posibel pa nan tambe compronde.
‘Un baby por sinti hopi stress’
Sra. van der Linden ta splica: “Na dado momento den psicologia mes nan ta ripara cu interna muchanan so no ta e solucion di mas miho pa nan. Pasobra e muchanan cu ta drenta tin hopi mas problema y traumanan caba. ” E psicologo ta sigui splica Bon Dia cu na varios pais desaroya rond mundo diferente estudio a wordo haci riba e tema aki tambe. Un di e cosnan cu nan a conclui ta cu e ta hopi importante pa haci algo mesora pa un mucha ora cu ripara cu tin un trauma mas jong cu ta posibel. Esaki pues pa preveni mas daño of pa e mucha no crece cu hopi problema di comportacion, problemanan psikiatrico, problemanan den relacionnan y mas. “Antes e pensamento tabata otro.
Ora cu dos persona pleita dilanti di un baby e pensamento tabata ta cu e no ta afecta e baby. Pero awor tin manera pa midi e nivel di stress den baby tambe te hasta den e bariga di e mama. Pues si e mama ta experiencia hopi problema di cualkier tipo, mayornan ta pleita of algo otro, esaki por afecta e baby,” sra. van der Linden ta splica. E ta importante pa analisa con pa soluciona esaki hunto cu e famia of mayornan mes segun e ta sigui bisa Bon Dia.
“Antes e pensamento tabata cu ta warda te ora e muchanan ta bay scol, y na scol nan ta ripara cu e muchanan no por sinta keto of no por concentra. Mientras cu awor e manera nobo di psicologia y IMH kier pone mas enfasis riba e tempo mesora cu e mucha ta sufri e problemanan di stress. Hopi biaha e famia mes no sa ki influencia nan comportacion tin riba e mucha. Por medio di esaki, e contacto cu e mama ta keda hopi importante. Pues nos kier guia e mama pa wak con e por mehora y crea un bon relacion cu e mucha. Pasobra esaki ta hopi importante pa e celebro y desaroyo di e baby y mucha.”
