Pero nada comodo pa nos…

E situacion na Venezuela ta sigui exigi nos atencion. Esey tin su motibonan. Cualkier medio riba e continente aki ta dedicando hopi atencion na e situacion di nos bisiñanan. Esey no ta pornada. Imagina cu nunca antes tabatin un fenomeno asina, ni con leu nos bay den historia di e continente aki. Djis imagina, un miyon y mey di persona cu a huy caba di nan pais… Claro cu tin caso pio cu Venezuela. Nos por djis contempla e situacion na Siria, unda desde 2011 a sali varios miyon persona bay busca un destino na otro luga. Pero, Siria ta escenario di guera, unda dia den dia afo, e bandanan ta yobe otro cu bom y artileria, lagando e ciudadnan manera monumento macabro di e cosnan mas malo cu e rasa humano por haci.

Venezuela a contrario no tin guera. O mester ta cu bo ta haya cu ta gobierno ta hibando un guera contra su mesun hendenan, anto nos por ta di acuerdo cu otro. Ta increibel e nivel di destruccion, no cu arma, pero cu ignorancia y terkedad, cu e hendenan aki a logra haci den menos di 20 aña. Saliendo for di pensamento totalmente atrasa, cu ni nan cambradanan na China ta kere aden ainda, nan a logra destrui loke ta e base mas importante di un pais: su aparato productivo, djis pasobra nan ta kere cu den e temponan aki ainda por copia e modelo Cubano, cu ni na Cuba mes no a funciona. A desarma henter e produccion agricola, cu normalmente lo mester ta bon pa exporta, no pa importa manera ta sucede na gran escala actualmente. A desarma gran parti di industria, tur fabrica di auto a dal porta cera poniendo tur hende riba caya. Y asina a sigui hopi mas ramo industrial, lagando uno so como ultimo, cu tambe ta den cay den otro: e orguyo nacional Pdvsa, cu a keda como unico fuente di gana divisa pa henter e pais, pero cu no por, manera nos a yega di bisa anteriormente, gana asina hopi placa cu e ta yega pa politico, militar y polis horta na grandi, importa cada biaha mas cuminda y medicamento y un monton di otro asunto necesario, anto ainda resta placa pa e compania tene su mes na bida, invertiendo y manteniendo su instalacionnan manera mester ta, y manera nan tabata haci’e, tempo cu Pdvsa tabata conta den e mundo petrolero como e number dos, despues di e gigante ExxonMobil.

Den e dianan aki nos por tuma nota di hopi noticia cu cada un ta brinda nos otro indicacion cu e situacion pa e compania y pa e pais ta yegando un climax. Por ta cu esey no ta bay sucede ainda prome cu e eleccion presidencial fraudulento tuma luga aki menos di dos siman. Tur cos ta prepara pa Nicolas Maduro keda reeligi como presidente, loke no ta asina dificil si ta su hendenan so lo bay vota, pues e lo por gana cu un mayoria grandi. Cu practicamente ningun pais, salvo e regimennan di mesun categoria riba e continente aki y na otro parti di mundo, lo reconoce su eleccion, no lo importa e señor aki un bledo, pero cu esey el a gana un bataya, pero no e guera cu e lo perde di tur manera. E guera cu e ta hibando, no ta contra oposicion, sino contra e situacion cu nan mes a crea: un economia cu a krimp te casi mita di loke e tabata y pa colmo no por lanta para di su mes mas.

Y e piesa clave den henter e asunto aki, ta e empresa petrolero, cu ta haya golpi di tur banda: nan produccion ta sigui cay pasobra no tin placa pa mantenemento; e empleadonan cu experiencia ta huy pasobra nan no por biba di e salario miserabel cu a keda awor cu inflacion a come tur cos. Djis purba imagina un ingeniero cu tabata gana ekivalente di 5000 dollar pa luna. Awor loke a resta di e salario ta ekivalente na un par di dollar, cu cual e no por cumpra cuminda pa dos dia…

Riba tur esey awor ta bin e sancionnan aplica pa Merca y Union Europeo y cierto paisnan di nos region, y awor tambe e embargonan cu ta tumando luga riba teritorio Hulandes-Caribense… Awor si nos no por bisa mas cu loke ta pasando na otro banda di lama, ta un ‘ver van mijn bed show’. E ta den nos cara y mester deal cun’e. Naturalmente Corsou ta mas importante pa e compania ConocoPhillips pa pone embargo, pasobra e refineria ta funciona. Pero aki tambe tin un terminal di crudo unda tin material entre otro di Pdvsa almacena, pues por ta cuestion di tempo prome cu nan yega aki tambe. Y esaki un biaha mas ta indicacion cu e caida di e empresa ta inminente, y ta indicacion cu e proyecto aki di Citgo no tin futuro. Esey ta negativo? En principio no, no ta nos placa nan ta busca, pero nos por siña algo di esaki. Cu pa basta tempo nos a permiti nos gobierno(nan) biba den ilusion y kere loke e hendenan aki tabata conta. Esey mester caba.