Awor si mester keda warda den exterior riba prome permiso di estadia

Personanan cu kier biba y/of traha na Aruba, mester un permiso prome cu nan yega nos isla. Despues di haci un peticion mester keda warda te ora ta ricibi e permiso pa drenta Aruba. Pero gobierno no tabata controlando riba esaki. Tabatin estranhero tambe trahando sin e procedura di permiso tabata finalisa. E gabinete actual a laga e situacion ey te awor, asina minister encarga, Benny Sevinger a bisa 24ora.com.

Pero awor tin cambio na caminda unda lo no permiti persona di bin Aruba sin cu e proceduro di permiso a keda cla. Pues e mester warda su premiso di trabou den exterior. Den e caso cu e persona no a warda, y a cuminsa traha caba, gobierno lo cancela e permiso y lo deporta e trahado. Tambe e dunado di trabou lo haya un boet.

Bandi di esaki lo controla mas severo riba persona cu a pidi un permiso di estadia como turista pero ta uza esaki pa bin traha na Aruba.