E Codigo di Proteccion (Meldcode art. 243 den buki 1), conoci den nos Ordenansa Nacional como e “Advies- en Meldpunt Kindermishandeling (AMK)”, a drenta na vigor dia 20 di November 2020.

E Codigo di Proteccion ta cay bao di auspicio di e Sociaal Crisisplan (SCP) cu tin como obhetivo pa reenforsa e sistema nacional di proteccion di mucha. E vision di SCP cu e implementacion di e Codigo di Proteccion y e metodo di “Signs of Safety” ta pa yega na un sistema uniforme y adecuado den cuadro social, hudicial, enseñansa y salubridad cu lo yuda na reduci e cantidad di casonan di abuso di mucha en general.

Despues di un aña di trabao intensivo door di e ekipo di Codigo di Proteccion bao auspicio di Sociaal Crisisplan a logra prepara y awor lo introduci e maneho, ehecucion di Codigo di Proteccion den sector social, enseñansa, husticia y salubridad publico.

Codigo di proteccion ta drenta na vigor pa tur profesional, cu ta traha directo y indirecto cu mucha, hoben y nan famia, oranan tin sospecho di abuso di menor, e ta structura e proceso di evalua e sospecho di abuso haciendo uso di cinco paso cu ta describi den LBHam.

Durante un aña a wordo haci diferente training di Signs of Safety (SoFS) na mas di 300 persona profesional den e cuatro sector menciona. SoFS ta e herment cu profesionalnan ta usa den cinco paso di Codigo di Proteccion pa asina pone e mucha of hoben central y sigur.

Den e proximo simannan lo bay tin training intensivo di un total di 14 persona cu lo bay dedica nan mes como “Train de Trainers”, via LVAK (Landelijk Vakgroep Aandachtfuncionaris Kindermishandeling), di Hulanda. Nan lo ta encarga cu e responsabilidad pa guia y duna curso na e supervisornan di Codigo den tur 4 sector y asina garantisa cu e supervisornan ta keda na altura di tur loke ta encera (sospecho di) abuso di mucha y violencia relacional. Ta premira cu na comienso di april, Codigo di Proteccion lo drenta na vigor.

Segun a wordo indica minister di Asuntonan Social y Labor Glenbert Croes den su ultimo conferencia di prensa, e profesionalnan di e grupo aki aworaki ta haci’e esencial y un obligacion di e sector profesional pa no solamente meld sino actua y soluciona e problema ora cu nan lo haya señalnan di posibel abuso contra muchanan.

E profesionalnan mester actua den un plan di accion cu ta wordo complementa den cinco paso, e prome ta acumula señalnan y pone nan riba papel, pone e potecialnan positivo dentro di e famia tambe riba e papel.

Paso dos, nan mester consulta un colega of cu e supervisor di codigo di proteccion y/of yama pa conseho na Bureau Sostenemi.

Di tres paso, e profesional mester papa cu e famia y si ta posibel cu e mucha, pa siguientemente haci un evaluacion di e siguridad di e mucha y como ultimo paso tuma un decision tocante si e mes pro brinda e ayudo, of busca ayudo di otro y haci e consulta cu Bureau Sostenemi si mester haci un notificacion.

Di esaki, minister Croes a señala cu nan a sinti cu e metodo aki cu awor no por sconde tras di Bureau Sostenemi sino cu mester actua como profesional, por lo tanto e ta considera cu mester encurasha e profesionalnan, asina mes el a sigura cu e grupo aki ta ricibiendo training pa asina nan por bira supervisor di e codigo aki.

Tur instancia cu ta den e veld social y otronan como husticia, enseñansa y salud den e cadena di instancia cu ta atende e tema di abuso di mucha cu ta atende cu asistencia, ayudo y conseho, mester tin un supervisor di codigo pa bisa con pa actua, na unda mester bay of kico lo por haci y busca un solucion cu nan mes mester soluciona.

Minister a menciona cu nan ta espera cu e forma di traha aki lo ta un forma mas efectivo cu ta obliga di meld, tuma accion y soluciona cu e interes di protege e bida, integridad fisico y mental di e muchanan.

A keda conoci cu esaki ta un sistema di proteccion na Aruba, unda ta salvaguardia e siguridad fisico, emocional y mental di e muchanan desde 0 te cu 18 aña.