E proceso pa yega na introduccion e uzo di bancomatico na HBK-nan a tuma un tiki tempo, ya cu prome mester haya aprobacion di Departamento di Finanza y planificacion hunto cu banconan. “Pero awo nos ta asina leu cu Gobierno por anuncia cu clientenan por “swipe” pa paga tur nan facturanan cu ta wordo haci cerca nos.” Cu un solo transaccion e ta haci su pagonan di WEB, ELMAR, SETAR, Serlimar of FCCA. Den oranan di atardi e transaccion di e cliente ta wordo procesa y manda banco pa e compania cu mester haya e pago. E companianan estatal por mira online di biaha cual ta e clientenan cu a paga via di HBK. “Pa e cliente e ta sigur un forma mas eficiente pa atende cu su pagonan y ta duna nan mas siguridad,” sra. Margaretha a splica.
Pa e Oficinanan Auxiliar e sistema di pago via “swipe” tambe ta un alivio, ya cu di e forma aki ta minimalisa e presencia di placa efectivo den nan oficina. E sistema nobo di pago via “swipe” ta algo cu a cuminsa cu ne na aña 2014, despues cu den 2013 a cuminsa cu e preparacion, pero pa motibonan administrativo a stop esaki temporalmente. E aña’ki tur reto a keda resolvi y ta asina leu cu uzo di bancomatico ta un realidad na Hulpbestuurskantoornan na Aruba.
Fuente: comunicado gobierno
