Awor por haya vacuna y booster shot na ImSan

Ayera mainta na ImSan di San Nicolas prome minister Evelyn Wever-Croes a duna un conferencia di prensa conhuntamente cu Rino Hermans di Bureau Rampenbestrijding Aruba (BRA) y Joel Rajnherc director di ImSan pa asina informa comunidad tocante Operation Mobile Unit cu ta bay duna servicio di vacunacion.

Operation Mobile Unit manera a ser anuncia caba ta un trailer di BRA cu lo bay ta ubica na diferente barionan pa asina yega mas cerca di esunnan cu kier haya e prome, di dos vacuna of e booster shot si e persona ta bin na remarca.

For di ayera e booster ta disponibel pa personanan riba 30 aña segun loke prome minister a indica den e conferencia di prensa aki unda cu el a papia di e cifranan bisando cu nan optimista pero cauteloso, den un siman cifranan di vacunacion a cuminsa baha y specialmente den ultimo tres dia.

El a recorda cu siman pasa tabatin tres dia tras di otro cu mil caso nobo cada dia y aworaki e casonan ta rond di 500 pa dia, el a sigura cu ohala e tendencia aki lo por sigui continua pa asina baha e cantidad halto di casonan.

Te ayera tabatin 3.342 caso activo lo cual ta mustra cu cifranan ta bahando, tasa di positividad ta keda halto cu 66% loke ta nifica cu e preocupacion y alerta ta keda ainda pero no ta motibo di panico.

Pa loke ta trata hospital, te ayera tabatin 30 persona na hospital, 4 den unidad di cuido intensivo (ICU) y 26 riba piso general, na Colombia tin 3 persona den ICU.

“Nos no a sali di e problema ainda, nos no a sali di e candela ainda, nos mester sigui cuida”, prome minister a declara.

Ademas, el a bisa cu e medidanan cu nan a tuma ta dunando resultado si ta compara Aruba cu otro paisnan di e region, e cifranan di Aruba ta bahando pa via di e decisionnan importante cu nan a tuma.

Vacunacion ta keda como e proteccion mas importante y esey ta lo cual ta dunando e resultado pa protege comunidad, “no ta tur hende kier vacuna y nos ta respeta esey, pero nos ta urgi si kier vacuna pa por vacuna”, el a sigura.

83% di e poblacion riba 60 aña tin dos vacuna caba, poblacion di 18 te 59 aña ta na 74%, di 12 pa 17 aña ta na 56% loke ta duna un averahe di 78% di e pais cu tin e dos prome vacuna, “esaki ta cifranan halto pero no ta e caminda cu nos kier bay, tin hopi hende ainda cu ta falta pa busca nan prome y di dos vacuna, akinan nos ta bezig cu e booster” prome minister a comenta.

Te cu dialuna ultimo 17.583 persona a tuma e booster loke ta representa 23% so di e poblacion, ayera nan a cuminsa cu e unidad mobil na San Nicolas na ImSan pa asina ey e vacuna por yega na esunnan cu no tin e facilidad di yega na otro centro di vacunacion.

Di su parti, Rino Hermans a menciona cu nan por a constata durante e proceso di februari te cu september di aña pasa na unda nan tabata bezig cu proceso di vacunacion den tres diferente districto na Aruba como Don Bosco na Noord, Centro Deportivo Betico Croes na Santa Cruz y Santa Teresita na San Nicolas, “na final bo a ripara cu hopi hende pa motibo di mobilidad no por a yega na e centronan”, for di e momento ey Hermans a splica cu nan a pidi permiso di gobierno pa asina haci uso di e Bus di Salud y renobel’e pa asina nan por yega na e barionan, te porta di e cas unda cu algun di nan pa un motibo of otro no por yega.

Te awor, e unidad mobil aki lo keda na San Nicolas segun loke Hermans a expresa pa nan por yega na e grado di vacunacion cu nan ta espera pa despues lo keda mobilisa den tur bario, “aworaki nos kier baha e presion di San Nicolas y di eynan nos ta bay cuminsa move na otro districtonan, campaña di vacuna no ta bay caba tanten nos lo yega na e grado di vacunacion cu nos mester tin pa por sali afo di e situacion akinan”, Hermans a expresa.

E bus tin un capacidad di vacuna 15 hende cada 15 minuut, unda cu Hermans a sigura cu nan ta bay ahusta e logistica, despues cu e persona lo haya e vacuna, bao un tent e persona tin cu keda warda 15 minuut reglamentario pa asina wak si e persona ta alergico y asina tin un ‘flo’ mas lihe, e capacidad pa dia ta di 200 pero nan kier his’e na 300 pa dia pa e por tin efectividad den full e comunidad.

Asina mes, Rajnherc a bisa cu e rol di ImSan na e momentonan aki ta pa vacuna lo mas hopi posibel na Aruba, “nos no a organisa esaki, pero mirando cuanto hende kier vacuna, nos ta mira cu hopi hende di edad halto ta haciendo esfuerso pa bin akinan”, el a sigura.

Tambe, el a trece dilanti cu kisas esaki no ta e solucion solo pa evita pa personanan haya e infeccion pero e ta pa personanan no bira malo, e ta zorg pa evita cu hospital pabou di brug lo yega na full su capacidad cu hende cu hospital no por duna e cuido, “nos no kier back na un situacion cu e cuido cu nos tin cu duna regularmente, normalmente, no por tuma luga, nos kier zorg pa nos por sigui trata tur otro sorto di malesa cu nos hendenan tambe tin” Rajnherc a finalisa.