(Infobae) – For di ayera e mayornan lo por acorda cua lo ta e prome fam den e nomber di nan yiu, despues cu Congreso di Republica a aproba den un ultimo debate e proyecto di ley cu ta elimina e asignacion automatico di e fam di e tata.
E representante Maria Jose Pizarro, ken ta autor di e iniciativa aki, a sigura cu awor e mayornan lo dicidi via un acuerdo cua di e famnan ta bay ta prome. “Ta un paso grandi pa kibra e buraco di genero cu ta existi na nos pais, pa kibra tur e autoridad imaginario di hende homber, ta un proyecto simbolico cu ta reconoce e balor di criansa, e labor di cuidado y claro esun di e mama na nos pais”, el a señala.
Un di e principal discusion di e debate tabata e mecanismo di decision den caso di desacuerdo. E senador Angelica Lozano a propone pa cu lo laga e fam di e mama si no lo haya un acuerdo entre mayornan, sinembargo, segun Pizarro, a establece cu lo ta via un sorteo e manera con lo fiha cua di e dos fam lo ta na prome luga.
Den sentido aki Registraduria Nacional lo establece un mecanismo pa realisa e sorteo, e cual e funcionario encarga di e registro di e menor lo aplica, semper y cuando e mayornan no lo yega na un acuerdo.
E ley lo aplica pa yiunan den matrimonio, pafo di matrimonio, adoptivo, di union marital, pareha conforma pa e mesun sexo y pa e caso di e yiunan cu paternidad of maternidad declara pa decision hudicial.
Diamars den oranan di anochi a wordo inclui den agenda y finalmente a wordo vota y a logra 59 voto na fabor y 2 den contra so.
Di acuerdo cu cifranan entrega pa DANE, 40,7 % di e hogarnan Colombiano tin como hefe di hogar mamanan, y 56% di mama na Colombia ta lider di famia, loke ta nifica 12.3 miyon di muhe.
