Ayera mainta, minister di Asunto Social y Labor, Glenbert Croes a anuncia e culminacion di e Sociaal Crisis Plan (SCP). E meta tras di e plan aki tabata reenforsa un sistema di proteccion y cuido contra abuso di mucha, y pa esunnan mas vulnerabel.

Resultado

Segun e mandatario e SCP ta un fundeshi cu nan a pone y proximamente nan lo tuma e decision con nan lo hacie duradero. Nan intencion ta di dun’e un structura permanente den cuadro di e siguiente proyecto grandi, cu ta e Plan Social Nacional. E ta premira cu e plan aki lo bay determina e futuro di e siguiente pasonan di e Sociaal Crisis Plan.

E mandatario a declara cu pa medio di SCP nan a haci den 3 aña – desde cu e plan aki a keda instala na 2018 – loke no a wordo haci den 30 aña riba e tereno social. Mientras cu e ta haya cu e impacto grandi di e plan aki comunidad lo wordo mira na mediado y largo plaso. Sinembargo e minister a indica cu tambe na corto plaso tin resultado di SCP. E lista di spera den diferente departamento cu ta brinda asistencia riba caso di abuso di mucha a wordo reduci ‘drasticamente,’ segun minister Croes.

E minister den presencia di directora di departamento di Asunto Social (DAS), Glenda Hernandez kende a guia e proceso di implementacion di e plan aki y su team, a elabora riba e implementacion di e plan aki den cuater sector: social, enseñansa, husticia y salubridad publico. E mandatario a laga sa cu nan kier sigura e bienestar y siguridad di cada mucha y tur hoben cu implementacion di e SCP, pero tambe nos grupo di muchanan special.

Den e proyecto aki a wordo contrata 62 profesional. Pero tambe tin 500 profesional di e cuater sector menciona cu ta forma parti di e plan di accion pa preveni e problema aki. Pero igualmente nan plan di accion ta ora cu lamentablemente e caso a sosode caba pa nan actua pa atende e problema aki.

Rapport di Unicef

Minister Glenbert Croes a referi riba un estudio di Unicef na 2018 cu a constata varios problema. Entre nan cu mester mas sosten y guia profesional den e criamento di nos yiunan. Tambe nan a señala cu nos mester di mas datonan riba mucha y hoben y e necesidad di un registracion central. Igualmente nan a constata cu no tin un centralisacion sino cu ta manda e cliente na diferente luga, caminda nos profesionalnan mester traha mas hunto. Otro aspecto tin di haci cu e necesidad di leynan mas apropia pa garantisa un miho siguridad di nos muchanan.

Segun e mandatario, den cuadro di SCP nan a tene cuenta cu e sugerencianan di e rapport di Unicef. El a anuncia cu lo bini cu varios centro. Nan a bin cu e proyecto di Centro pa Hoben y Famia pa duna mas sosten na e mayornan pa e lantamento di nan yiunan. E centro aki ta situa na Wayaca y ya caba a conoce un soft opening.

Tambe nan tin plania di habri un centro ora cu un mucha ta victima di abuso pa e por haya tur ayudo inmediato. E centro aki lo bira Family Justice Center. Den e centro aki nan lo trece tur servicio pa trata casonan relaciona cu delito contra menor bao un solo dak. Den e centro aki –segun e mandatario- nan ta haya e servicio medico, forensico, hudicial y social. E ta spera cu tur instancia, departamentonan y ministerionan por coopera hunto pa asina garantisa cu e centro aki por bira un realidad.

Tambe lo bin cu un centro pa muchanan special cu servicio 24 ora pa biba independiente of haya cuido intensivo bao encargo di Stichting Ambiente Feliz y Stichting Verstandelijk Gehandicapten Aruba (SVGA).

Tambe nan ta biniendo cu e ley di Codigo di Proteccion cu dialuna ultimo, e matutino aki a dedica un articulo cu e coordinador di esaki, ex parlamentario Sue Ann Lacle-Ras. Pa medio di e codigo aki lo capacita nos profesionalnan di e cuater sector menciona con pa detecta y resolve e problemanan di abuso di mucha. E proyecto aki lo wordo entrega na Parlamento prome cu fin di aña.