Awor cu diferente sector ta activo y frontera lo habri: Tur ciudadano mester tin control di nan propio siguridad y cuido di salud

Diferente actividad ta cay den e fase 3, entre nan apertura di cas di cuido, bar y club nocturno. Sinembargo Prome Minister, Evelyn Croes-Croes a haci un advertencia pa henter comunidad pa tene cuenta cune. El a bisa cu poco poco nan ta habri cierto sector, pero esaki ta nifica cu nan ta dunando cada ciudadano bek ‘e control di bo propio siguridad y cuido di bo salud’.

E mandatario a laga sa claramente cu nan tabatin e control ey, ora cu dia 13 di maart a reporta e prome dos caso di Covid na Aruba. Nan a bin cu medida manera shelter in place y toque de queda pa contene cu e virus por a plama mas riba nos isla. Te aworaki a registra 101 caso di Covid.

Actualmente pa mas cu un luna no tin mas caso activo di e virus, Aruba ta ‘Covid free’. Pero diaranson anochi e mandatario a declara cu awor nan ta pasa e responsabilidad aki bek. “Nos ta spera cu bo por haci hopi bon uzo di esaki pa cuida abo y bo famia,” el a laga sa.

Ya caba gobierno a anuncia cu entrante 15 di juni awor, nos isla ta cuminsa habri su frontera bek. Esaki ta bay gradualmente den fase, teniendo cuenta cu cierto region y paisnan. E prome ta dialuna awor cu ta inclui e islanan di ABC (Aruba, Bonaire y Corsou). El a bisa cu pa yega na e punto aki a tuma hopi ora di reunion y deliberacion. Tambe nan a busca hopi conseho di nos expertonan local y tambe di Hulanda.

“Nos a haya varios conseho y no ta sigui tur al pie de la letra,” el a bisa. A base di e consehonan aki a bin na e conclusion cu Aruba gradualmente por habri su frontera.

Minister Dangui Oduber encarga precisamente cu dos cartera clave, salubridad y turismo, pa loke tin di haci cu e fase aki di apertura di nos frontera tambe a trece su punto di bista dilanti. E hoben mandatario a bisa cu nan ta bin trahando pa asina ta prepara di e miho forma posibel pa mitiga e risiconan di importacion di casonan nobo di e virus na Aruba.

E ta reconoce cu esaki no tabata un decision facil. Nan tabata debati riba e medida di prevencion cu como pais nos mester tuma pa prepara nos mes miho pa reactiva nos principal sector economico, cu ta turismo. El a bisa cu e decision aki a wordo tuma di e forma mas responsabel posibel pa habri nos frontera bek, y nan ta sinti nan mes confortabel cu e decision aki, el a bisa. “Nos a yam’e un riesgo calcula,” el a declara. Tur cos ta wordo monitor a base di data di e cantidad di turistanan cu nos ta cuminsa ricibi e prome dos simannan.

E hecho cu nos tin mas conocemento riba e virus y experiencia con pa trat’e cune y controla e riesgo di transmision den nos propio comunidad, ta pone nos den un situacion diferente cu prome cu nos a haya presencia di e virus. Tambe el a laga sa cu nos ta bon prepara: Nos a amplia nos capacidad di cuido y ICU cu bon cooperacion di Hulanda. Tambe nan a busca mas personal pa yuda nos den hospital, y tambe mashin di hala rosea artificial. Tur e preparacion aki lo yuda den caso cu si nos lo haya confronta cu e virus. Tambe el a bisa cu nos tin protocol implementa pa tur sector.

Oduber a remarca cu ta responsabilidad di cada comerciante y ciudadano pa sigui e protocolnan aki. Pasobra esaki ta e unico forma cu nos por siña biba cu e risico.