Dialuna anochi, prome minister Evelyn Wever-Croes a presenta un plataforma di diferente comision y den varios fase di implementacion pa atende cu e aspecto di recuperacion economico cu e crisis di coronavirus/Covi-19 a ocasiona den nos pais.
El a cualifica cu esaki ta marca otro fase den e crisis di e pandemia aki. Mientras keto bay e aspecto di salud ta bao control cu menos caso positivo; awor gobierno lo enfoca riba aspecto di recuperacion economico. Cada comision di e structura aki tin nan propio meta y periodo defini den dje pa nan por haci nan respectivo trabao.
El a bisa cu e ta un structura amplio y tambe uno participativo pa mustra comunidad kico nan ta haciendo y con nan ta bay haci pa recupera nos economia. Gobierno a comparti e structura cu nos ta publica cu e relato aki.
Structura.
E mandatario a laga sa cu structura por mustra grandi y complica, pero e no ta di e complica ey. Ta bon pa informa cu bao di conseho di minister y minister presidente, nan a institui loke nan a wordo yama un stuurgroep. E stuurgroep aki integra pa representante di e sector priva y semi-publico. E persona cu ta forma di dje ta Sra. Sharon Frankel, Sr. Rhyan Peterson, Sr. Gilberto Croes y sra. Ronella Tjin Asjoe-Croes. Nan ta esunnan cu ta bay guia full e structura y proceso cu mester hiba nos riba caminda di recuperacion economico.
Premier Wever-Croes, contestando pregunta di Bon Dia Aruba a laga sa cu e structura aki y nan respectivo comision lo keda institui pa un tempo defini. Ya cu e structura aki ta pa lanta nos economia bek, y unabes cu nos economia ta cuminsa draai, e trabao di e comision ta finalisa.
El a splica cu tin tres categoria di comision. E prome comision ta esun cu ta traha riba termino inmediato y ora cu nan ta bin cla nan trabao ta caba. E di dos ta traha a base di termino corto cu tin di haci cu e proyectonan fast track y nan trabao ta finalisa ora cu e proyectonan aki ta den ehecucion caba.
Y e di tres categoria di comision ta esun cu ta bay diseña e modelo economico nobo, y esey su trabao ta caba ora cu pais Aruba ta asina leu cu e modelo economico nobo aki ta canando riba su propio pia keto bay.
