Awor campaña a cuminsa den serio

E mester a sucede na cierto momento. Un di e dos rivalnan grandi cu tempo nan tabata colega tambe ta crusa spada regularmente caba, awor plenamente ta adversario politico y no tin motibo pa consideracion mas. Esaki tabata exactamente tono y contenido di e entrevista cu ministro encarga cu Husticia a duna cu pa gran parti tabata trata di su relacion cu e ex ministro di Turismo. Cu nan ta ‘end up’ siendo rival no ta nada straño; tur dos tin un caracter fuerte y esey no ta nada straño, pasobra pa bo ta politico bo por y hasta mester ta ambicioso y dispuesto pa ‘go the extra mile’ pa logra bo meta. Nada malo cu esey. Pero ora cu e conflicto ta desborda, no por ta asina cu nos ta simplemente bisa ‘unda tin dos ta pleita, tin dos cu tin culpa’. Esey por ta asina, pero laga nos bay un tiki mas den detaye cu e asunto aki.

Por ehemplo, e ministro di Husticia ta bisa cu su ex colega tabata pretende di por influencia o hasta pio, dicidi kico ta tuma luga den Husticia, pasobra e ta pone e placa, procedente di turismo. Esey ta zona rasonabel, pasobra di unda cu e placa ta bin, mester uza esey na un manera cu ta cuadra cu e maneho cu e ministerio specifico ey ta hibando. E problema naturalmente ta cu ta tocando aki un asunto di siguridad pa e area turistico, unda no sin mas e ministro encarga cu turismo por bisa “wel, ata: e placa aki, wak kico bo ta bay haci cu ne.” Y delibera tocante prioridad den uzo di recurso no necesariamente ta implica cu por dicidi kico mester sucede.

Pero e problema real ta bay un tiki mas profundo y esey tin di haci cu e structura den cual a hinca Aruba Tourism Authority (ATA). Prome cu a institui e organismo “sui generis” aki, e recursonan cu tabata bin di impuesto riba e sector tabata bay directamente pa caha di gobierno. Aki tabata asigna, a base di presupuesto, un cierto suma na e departamento di turismo. E problema structural conoci tabata cu ora mester fondo pa inverti den campaña promocional cu urgencia, tur e tramitenan financiero di gobernacion tabata conta pa e oficina di turismo tambe. Cu consecuencia cu no tabatin e flexibilidad den operacion cu ta necesario pa por hiba un maneho agil y adecua.

Awor, no ta asina cu desde cu e placa di impuesto di hotelnan ta bay directamente pa e organismo nobo, esaki a bira placa ‘di nan’. E ta keda placa di pueblo di Aruba, cu mester administra y uza cu sabiduria. Ta p’esey ta importante pa establece e cuadro estricto pa uzo di e recursonan aki. Fuera di e gastonan di operacion y reserva rasonabel pa tempo malo, e resto mester bay pa caha di gobierno. Pero ora ta crea un situacion cu organismonan ta haya sumanan grandi na nan disposicion pa dicidi riba nan mes kico pa haci cu ne, nos ta riba mal caminda. Siguridad den area di hotel keto bay ta siguridad y ta responsabilidad di e ministerio di Husticia.

Sin embargo, mescos cu den otro area y caso, nos por observa cu e diferencia entre e dos ex coleganan ta e diligencia den maneha y ehecuta loke tin pa haci. Ta facil pa bisa cu ministerio di Turismo a keda menos afecta pa e medidanan di austeridad cu a tuma pasobra via ATA tabata mantene acceso na fondo casi sin limite. Pero esey no ta kita cu e ministro di Husticia, lealmente a bay di acuerdo pa corta o laga corta den su presupuesto, na un momento cu e mester a realisa cu esey no por, sin compromete nos siguridad.

Despues ta bin e momento cu ta dicidi cu por bin placa for di fondonan di turismo (5 miyon florin), y nos ta haya e situacion cu e ministro di Husticia no a gusta cu ta tene e placa ey su dilanti manera un ‘carrot’, y su tras e ‘big stick’ di condicion imponi.  Ademas e ta reclama cu no ta cinco, sino dies miyon e tabatin mester. Sorry, excelencia, pero no ta esey abo mester a bringa dia a traha presupuesto. Asina ta facil pa yega na un presupuesto cu ta cumpli cu exigencia di Hulanda y CAFT, lagando afo un hala di asunto super urgente cu cual e departamentonan mester bay lidia despues.

En todo caso, por bisa cu e discusion candente entre e dos ex coleganan a trece algun asunto dilanti cu ta importante pa tene na cuenta. Nos no mester desvia nos atencion di loke na nivel general ta importante pa mantene como maneho.  Un ta e pregunta kico ta recurso financiero cu mester mantene den caha central di gobierno y kico ta descentralisa y pone fuera di control directo di parlamento. Den tur caso ta keda necesario pa evita fragmentacion di finanzas di gobierno, cu por crea mas flexibilidad pero no necesariamente miho maneho den su totalidad. E debate ey ta mas importante cu e pleito entre e dos contrincantenan.