Pa prome biaha, embahador di Brasil pa Aruba estableci na Trinidad y Tobago na Port of Spain, Jose Antonio Gomes Piras tabata di bishita na Aruba hunto cu su colega, Consul General di Brasil Jose Correa Da Silva Acioli.

E motibo principal di nan bishita tabata pa conoce Aruba y e comunidad Brasilero residente, asina como un reunion informal na Departamento di Relacion Exterior cu Edwin Abath, y tambe Departamento di Maneho di Calamidadnan, pa discuti y conoce e protocol den caso di un catastrofe, y por divulga e modelo estableci na Aruba pa otro isla den su hurisdiccion. Nan a keda sumamente contento cu e plan presenta door di Sr. Rino Hermans tocante e topico aki, segun un comunicado di prensa.

Tambe nan a laga sa pa esunnan presente den e reunion, cu a tuma luga diasabra anochi den ballroom di Hotel Riu Palace, cu a habri nan porta pa e encuentro ey por a bira un realidad, cu a partir di awo, e Consul di Brasil na Aruba, Carlos Andre Augusto, por brinda na comunidad di Brasilero na Aruba un mayor cantidad di servicio cu antes tabata solamente posibel directamente na Embahada na Port of Spain, locual antes mester tin su gastonan envolvi cu ticket di avion, hotel, algun dia di trabou; awor por brinda directamente na Aruba mes, entre otro:

– Renoba Paspoort di Brasil

– Registro di Nacemento

– Registro di Casamento

– Registro di Fayecimento

– Registro di Titulo Electoral

– Registro di Certificado Militar

Tur e documentonan menciona ta sigui wordo emiti na Embahada na Trinidad y Tobago, pero e tramite y tur conferencia di documento necesario pa cu esaki, asina como tur formulario, ta bay ta disponibel na Aruba mes, y e Consulado ta bay ta esun encarga pa envio y entrega di tur cos pa esunnan cu solicita, di manera cu e gastonan envolvi ta bay reduci considerablemente compara cu antes, door di evita un biahe te na e embahada mas proximo.

Mas detaye di full e proceso, cu ta den fase di implementacion, por consulta directamente cu Consul na Aruba pa esclarece, via telefon celular: 594-6001 of email:  carlos.aruba@gmail.com

E delegacion a keda encanta cu e amabilidad y cortesia brinda pa nan den su prome bishita, y ta laga un danki special pa Eleisah Williams, di Departamento di Relacion Exterior, kende a yuda cu tur e parti protocolar di e bishita aki, y tambe pa Milka Legger di Matthew’s Restaurant.