Terapista di famia na Departamento di Asunto Social, Enid de Kort ta conta nos cu internacionalmente abuso domestico ta hayando un otro contexto. Antes tur ora ta e hende muhe ta e victima y homber ta esun cu ta abusa. E ta splica nos cu awendia mas hopi bo ta mira cu e ta bin for di ambos banda.
“Nos sa haya hende hombernan den trabao cu a bin cu golpi riba nan curpa y no kier bay cas cu miedo pa wordo bati atrobe,” sra. De Kort ta splica Bon Dia Aruba. E ta sigui bisa cu e hende muhe hopi biaha ta fuerte den su vocabulario y ta ofende e homber net na e momento cu e ta trankil. E hende homber sin embargo, hopi biaha su reaccion ta uno fisico. Esaki e terapista ta constata ta pasobra hende homber mayoria di biaha no ta siña con pa expresa su mes.
Tres patronchi di abuso
“Den abuso bo tin tres patronchi tambe unda tin ora bo tin tension den e relacion y ta cuminsa sinti cu algo no ta bon. Despues ta bay pa e explosion unda e pleitamento y bringamento ta bin, cual por ta verbal so of hopi fisico. Despues ta bin e fase di honeymoon.” Sra. de Kort ta conta cu nan ta haya hendenan cu problemanan hopi grave fisico manera wowo blousa, cabey ranca, hinca cu cuchiu, kap cu machete, hendenan choca cu a hera muri y hopi mas. E ta sigui splica cu den e fase cu nan ta clasifica manera e ‘honeymoon’, ta unda tur cos ta bira bunita atrobe. Akinan e victima por haya regalo, un crucero of vakantie luhoso, seguramente si ta un persona di placa.
Circulo vicioso
“Violencia domestico ta bin den tur categoria, e ta pasa den tur estilo di bida. Hopi biaha tur e promesanan y dushiheid aki di duna regalo ta pone cu e pareha no ta bay for di otro. Asina e circulo ta bolbe cuminsa.”
Sra. de Kort ta bisa cu na Aruba mester tin un dia di pareha pero positivamente. E palabra violencia domestico mes e ta haya cu mester cambi’e pa algo cu menos peso. “Pasobra nos por keda pone atencion na hende muhe. Ami ta haya cu nos mester bay pone atencion na e relacion. Tin hende homber cu ta yega Departamento di Asunto Social por ehempel cu ta mentalmente abusa cu palabra por ehempel: Bo no ta sirbi como hende homber, bo no sa haci nada.”
Pues sra. de Kort ta boga entre otro pa bin cu un otro tipo di atencion riba violencia domestico. “Ban na e scolnan y trabaonan anto papia cu hende riba relacion; con bo ta forma relacionnan prome, kico ta e cosnan bon y kico mester mehora. Asina ki mi ta kere nos por kibra e patronchi di violencia domestico. No por keda wak e hende muhe solamente manera e victima pasobra e hende homber tambe mester di ayudo.”
