Awe y mañan mester entrega tur klapchi cu a resta na Wela

E temporada di benta y tiramento di klapchi a keda atras. Dialuna ultimo e fundacion encarga cu e decoracion di luz riba e casita na Sero Preto a dispidi di temporada di Pasco di Nacemento y cambio di aña cu un show di vuurwerk.

Rubin Ponson kende ta experto den explosivo di DOW y kende pa basta aña ta miembro di e comision encarga cu e maneho di klapchi a declara cu e temporada aki por lo general a bay bon. Den e sentido cu e control debido a tuma luga pa evita cu cosnan por bay robes.

Sinembargo despues di e cambio di un aña nobo 2020, ainda nan ta bezig. E problema di fin di aña tin di haci cu container cu a yega laat. Esaki a stroba un poco den nan schedule cu nan tin normalmente. Den e prome dianan di e aña aki nan a bay tuma over e klapchinan cu a resta. Esaki ta normalmente te dia 7 di januari, pero nan a pone pa awe y mañan, 8 y 9 di januari. Normalmente for di dia 27 di december pareu cu nan ta entrega e klapchinan na e sitio di benta, tambe nan ta cuminsa cu e trabou den e depositonan na Wela pa prepara esaki, y tuma e klapchinan despues di cambio di aña bek.

Pa entrega e klapchinan nan ta habri Wela entre awe y mañan for di mainta tempran. Esun cu ta yega prome ta cuminsa hinca su klapchinan, y ora e caba e siguiente ta bin acerca.

Esunnan cu no ta entrega nan klapchinan cu a resta, nan lo bin cu control durante aña. E por ta cualkier momento di aña, nan ta haci nan control na cualkier luga di benta of sitionan cu nan ta calcula cu por tin klapchi scondi. Si ta yega e caso cu nan ta descubri klapchi scondi den algun sitio, lo tin consecuencia pa e persona responsabel di dje. E castigo lo ta den forma di multa. Pero entre otro, si nan ta un bendedo of importador, nan no lo haya e permiso mas pa sigui cu e actividad comercial aki.

Igualmente e doñonan di e containernan cu tabata bende klapchi, nan ta haya dos siman despues di dia 1 di januari, kiermen mita di e luna aki, nan tin plaso pa kita esaki cant’i caminda of sitio cu nan a pone pa bende.

Ponson ta spera cu den e termino di e dos siman aki, tur container lo wordo kita. Si nan no ta cumpli lo por tin consecuencia pa nan, ya cu e maneho ta papia cu si nan no ta cumpli, e chens t’ey cu pa fin di aña bo no ta haya permiso mas pa bende klapchi.