Sindicato STA a yega di anuncia cu si prome cu dia 26 di september ultimo, gerencia di ATA no termina e negociacion di e contracto colectivo (CAO), lo bay tin accion, loke a sosode diabierna ultimo net riba Dia Internacional di Turismo.

Segun Presidente di sindicato STA, Diego De Cuba, e no ta descarta cu ta bin mas accion; por ta den transcurso di diamars y diaranson, si nan no ta mira un cambio den locual tin aworaki.

E accion di diabierna pa algun a bira un sorpresa, ya cu durante e ultimo dianan, gerencia di ATA y STA a yega di reuni, y nan tabata cla pa firma un proposicion of acuerdo cu intermediacion di Mediador di Gobierno pa atende cu e CAO nobo aki.

Sinembargo, Presidente di STA a declara cu e motibo di accion aki di un ora, ta debi na e situacion den cual gerencia di un compania cu tin suficiente forsa financiero ta sinta manipula na mesa durante negociacion cu ta tumando luga pa un CAO nobo. E sindicalista a bisa cu nan a splica ATA debidamente di e accion aki.

Ademas, e ta considera cu esaki ta un derecho di tur trahado na Aruba. “Si bo kier protesta un of dos ora, bo mag di protesta,” el a bisa. Si e compania ta opta pa hiba nan dilanti Corte, tambe nan por haci’e. Pero nan no por kita e derecho constitucional aki for di e trahadonan y STA ta para shen porciento tras di e trahadonan di ATA.

Reunion y accion.
Ayera De Cuba a declara na Bon Dia Aruba cu despues di e accion di diabierna, sindicato STA ta reuni cu su miembronan awe pa 5:30 atardi na sede di SIMAR.

E tin cu bisa cu e tension ta halto y ‘motibo pa mas accion tin’. Esta si gerencia di ATA no bin cu ‘algo drechi’, e trahadonan ta bay intensifica nan accionnan, ya cu nan ta dicidido y nan no ta bay acepta mas e posicion di gerencia. Nan ta considera cu e compania ATA SG ta ganando suficiente placa y STA ta haya mas cu hustifica cu nan por duna e empleadonan algo drechi.

STA ta compronde cu Minister di Turismo, Dangui Oduber a pidi gerencia di ATA informacion di tur salario di e empleadonan, pa asina gobierno sa precisamente kico ta pasando na ATA. Pero te dia di awe, e peticion di e mandatario no a wordo honra, pero ni na e hunta. E sindicalista ta haya cu esaki ta un falta di etica y respet di parti di gerencia di e compania.

Awe mester tabatin un reunion cu ATA riba e concepto cu nan a manda, pero STA a manda un contesta pa gerencia di ATA caba tocante e negociacion aki. De Cuba a bisa cu e ultimo carta cu ATA a manda su proposicion ta esun cu a causa tur e disturbionan. El a informa cu STA a haya e proposicion aki diahuebs laat, y nan a mand’e pa e trahadonan diabierna mainta. Pero ora cu e trahadonan a wak’e nan a rabia, pa locual nan a dicidi di bin cu un accion.

E sindicalista a bisa cu STA mes a trata pa no bin cu un accion, considerando cu tabata Dia Internacional di Turismo, pero e frustracion y rabia tabata grandi cerca e trahadonan cu nan a dicidi di bin cu un accion di un ora, y como nan sindicato, STA a sostene nan. E ta premira cu esaki lo por desemboca den un conflicto laboral mas halto cu gerencia di ATA.

Segun De Cuba, den e proposicion ultimo cu gerencia a manda ta manera nan a pone ‘un cuchiu na nos garganta.’ Eventualmente e accion aki lo bira mas intenso si no ta bin un solucion pronto pa atende cu e solicitud di e trahadonan. Nan ta pidiendo 150 florin di aumento pa luna, di cual 30% di nan ta bay practicamente den caha di gobierno. E ta haya cu locual nan ta pidiendo no ta algo descabeya, pero e no sa pa kico gerencia di ATA ta keda para terco.