Awe ta tuma luga e caso di falsificacion di prueba di vacuna Covid den Corte

Awe na Corte di Husticia ta bay presenta e tres persona cu ta acusa di participa den un organisacion cu tabata comete crimen di falsificacion di prueba di vacuna di Covid-19.

Den un relato di prensa, Ministerio Publico a informa cu awe 8.30 di mainta e tres sospechoso di e denomina “Vacuna Gate” di inicialnan J.R.R, G.G.O.O y M.G.J.M, ta bay ta na Corte di Husticia.
R., O. y M. ta acusa di a participa na un organisacion cu tabatin comete crimen como proposito, esta, falsifica pruebanan di vacuna y/of facilita pruebanan di vacuna contra reglanan, den e periodo di prome di maart 2021 te 14 di december 2021 y conhuntamente cu seis of mas otro persona.

R., O. y M. ta wordo acusa di a tuma placa pa registra vacunanan y/of hinca informacion den e sistema di data di DVG, , den e periodo di prome di maart 2021 te 14 di december 2021 y como ambtenaar den funcion di contratista na DVG, sabiendo cu e vacunanan aki no a tuma luga y cu ta usa e informacion pa un registro incorecto di vacuna.

Ademas, tambe ta acusa e persona di fam R. di posesion di cocaina riba 14 di december 2021.

Hechonan

Caso di Vacuna Gate y denomina pa Ministerio Publico como “Anglo” a cuminsa haya forma, den luna di augustus di 2021 un fuente di departamento di Salud Publico (DVG) a acerca na Bon Dia Aruba cu informacion concreto tocante posibel falsificacion, benta y legalisacion di carchinan di vacunacion di Covid-19 riba Aruba Health App.

E fuente e acerca un reportero specifico di Bon Dia Aruba na unda cu el a informa cu tabatin iregularidadnan tumando luga pa loke ta trata e carchinan y sticker di vacunacion di Covid-19. Pero na mesun momento e no por a bin dilanti publicamente pa miedo di represalia contra su persona. Tambe e fuente a señala cu un lote di carchi di vacunacion a ser perdi hunto cu un par di roll di stickernan di Pfizer- BIONTECH; e lote di carchi cu Aruba a haya ta solamente un number tin riba dje cu ta 012566, cu ta identifica cu e carchi ta di Aruba.

Lunanan despues a bira conoci cu tres persona tabata e sospechoso den e caso aki, na unda manera minister a afirma ayera, ta bay persigui nan. Aunke den esaki no ta trata di miyones di florin, e punto ta cu nan a comete actonan castigabel y nan tin cu responsabilisa nan mes pa esey.