Dia 1 di augustus a conoci como Dia Mundial di Cancer di Pulmon. Cancer di pulmon ta e causa principal di morto relaciona cu e malesa di cancer y ta representa cifranan di mortalidad mas halto entre hende homber y hende muhe.
Organisacion Mundial di Salud (WHO) ta indica cu humamento ta e causa principal di cancer di pulmon y ta responsable pa aproximadamente e 85% di tur e casonan di e malesa aki.
Cancer di pulmon hopi biaha ta wordo diagnostica den etapanan avansa ora cu e opcionnan di tratamento ta limita. E deteccion di personanan di riesgo halto pa e malesa tin e potencial di permiti e deteccion tempran di cancer di pulmon y mehora e cifranan di superviviencia.
E prevencion primario, manera e medidanan di control di tabaco y reduccion di exposicion na e factornan di riesgo, por reduci e incidencia di cancer di pulmon y salba bida.
WHO ta reconoce e impacto significativo di cancer di pulmon riba e salud mundial y a implementa diferente iniciativa pa aborda e enfermedad di manera integral. E respuesta di WHO ta enfoca riba e control di tabaco, e prevencion di cancer, deteccion trempan y mehoracion di acceso na tratamento y cuido di calidad.
E organisacion ta apoya e paisnan den e implementacion di politicanan di control di tabaco basa riba evidencia, incluyendo e aumento di impuesto riba tabaco, e aplicacion di prohibicionnan integral ariba e publicidad, promocion y sponsor di tabaco, y e implementacion di advertencia sanitario grafico solido den e productonan di tabaco.
E organisacion tambe ta promove strategianan di prevencion di cancer mediante e promocion di estilo di bida saludable y e minimisacion di exposicion na e factornan di riesgo ambiental.
Ademas WHO ta apoya e programanan di deteccion trempan y ta encurasha e paisnan pa implementa medidanan di deteccion pa poblacionnan di riesgo halto pa detecta cancer di pulmon den etapanan mas tempran ora cu e opcionnan di tratamento ta mas efectivo.
E organisacion di salud ta traha pa garantisa e acceso na un tratamento y atencion di calidad pa e pashentanan cu cancer di pulmon proporcionando orientacion tecnico na e estadonan miembro, promoviendo e acceso equitativo na e medicamentonan esencial contra cancer y ta fomenta e colaboracion internacional pa comparti e miho practicanan y mehora e resultadonan di atencion di cancer.
Segun un estudio di Departamento di Salud Publico (DVG) na aña 2016-2017 e porcentahe di personanan riba 20 aña cu ta huma, e causa principal di cancer di pulmon, tabata 20.4%, hende homber, 6.9% hende muhe.
Pa categoria di edad di 20 pa 29 aña, e porcentahe di hobennan cu ta huma tabata 17.7%, pa e categoria di 30 pa 29 aña e porcentahe tabata 12.3%, 40 pa 49 aña e porcentahe tabata 8.4%, 50 pa 59 aña e porcentahe tabata 18.9% y riba 60 aña e porcentahe tabata 9.5%.
