Awe ta conmemora Dia Mundial di Asistencia Humanitario

Dia 19 di augustus ta oficialmente conoci como Dia Mundial di Asistencia Humanitario. Un dia na unda ta rindi homenahe y ta celebra tur persona cu compromete y cu ta traha pa brinda asistencia e personanan cu mas tin mester dje full rond mundo.

Pa e aña aki en conexion cu e Dia Mundial di Asistencia Humanitario, Organisacion di Nacionnan Uni (NU) a lansa e campaña “Nos t’ey, Kico cu Pasa”. Cu e campaña aki ONU ta conmemeora e di 20 aniversario di e atake cu bom contra e sede di ONU na Bagdad, Irak, y na mesun momento rindi homenahe na e personal humanitario di rond mundo pa nan compromiso solido cu e comunidadnan cu nan ta sirbi, sin importa ken ni na unda.

Kico cu pasa y a pesar di e peliger of e dificultadnan, nan ta esunnan cu ta drenta profundamente den e regionnan afecta pa e desasternan y den e prome liña di conflicto.

ONU ta remarca cu mester recorda cu e trahadonan humanitario no tin otro proposito mas cu salba y proteha e bida di e hendenan, como tambe yuda personanan afecta atendiendo nan necesidadnan basico pa sobrevivi. Nan ta esunnan cu ta traha man de man cu e comunidadnan cu nan ta sirbi y nan ta duna speransa cada dia y nan no mester obheto di atake nunca.

Dia 19 di augustus 2003, un atentado cu bom a tuma luga na e hotel Canal na Bagdad cu a cobra bida di 22 trahado humanitario, entre nan e representante special di e Secretario General di ONU pa Irak, Sergio Vieira de Mello. Cinco aña despues, e Asamblea General a adopta un resolucion cu a designa dia 19 di augustus como e Dia Mundial di Asistencia Humanitario.

Cada aña, e dia aki ta enfoca ariba un tema, reuniendo socionan di henter e sistema humanitario pa boga pa e sobrevivencia, bienestar y dignidad di e personanan afecta pa e crisis y pa e seguridad di e trahadonan humanitario.

ONU ta resalta cu aworaki 1 di cada 23 persona mester di asistencia humanitario. Den 2023 un cifra record di 339 miyon di persona ta bay tin mester di asistencia y proteccion humanitario, locual ta un aumento significativo compara cu e 274 miyon di persona cu tabatin mester asistencia na comienso di aña pasa.

ONU y e diferente organisacionnan social tin como obhetivo ofrece asistencia na e 230 miyon di persona cu mas tin mester di dje na 68 pais, loke ta bay rekeri di un suma di 51.500 miyon di dollar.