Riba dia 26 di januari, Aruba ta celebra Dia di Aduana, un dia unda ta tuma un momento pa reflexiona riba e rol importante di e departamento aki pa comunidad di Aruba, ya cu ta percura seguridad di nos fronteranan.
E trabao di Aduana ta uno complica y dificil, ya cu ta necesario pa tin hopi conocemento y precision. Aduana ta encarga pa controla tur producto cu ta sali y drenta Aruba, y ademas, ta encarga pa evalua e productonan y calcula e tarifa corecto pa importacion, generando entrada pa gobierno di Aruba.
Aduana ta responsable pa protege ciudadanonan di productonan importa dañino, y protege nos fronteranan for di importacion ilegal, combatiendo comercio ilegal y inhusto y asina protegiendo comercio internacional. Publico tambe conoce Aduana como e organisacion encarga cu colecta di varios impuesto y tarifa.
E aña aki, cuerpo di Aduana di Surinam, Aruba, Bonaire y Corsou a reuni na Surinam durante Siman Internacional di Aduana, cu ta dura te dia 26 di januari, coincidiendo cu Dia Internacional di Aduana. Esaki ta e prome biaha cu Surinam ta organisa Siman di Aduana. Tabata spera aproximadamente nobenta invitado for di e islanan pa e celebracion e siman aki, cu a cuminsa cu un ‘Meet and Greet’, y a inclui un tour door di centro di ciudad y un anochi cultural. Diahuebs tabatin un dia di deporte, y pa awe diabierna ta organisa un parada ceremonial y anochi di gala. Cuerpo di Aduana di Surinam e aña aki ta celebrando su di 160 aniversario.
Bon Dia Aruba ta manda palabra di pabien pa henter cuerpo di Aduana riba e fecha special aki!
Riba potret por observa celebracion di Dia di Aduana 2023.
