E aña aki a bira uno di hopi reto pa enseñansa debi na e pandemia. Awe pa cera aña 2020, SKOA ta realisa un Dia di Reflexion di forma virtual. E tema di e aña aki ta: “Enseñansa ta cuminsa den nos curason construyendo catedral.”

Nan ta cuminsa banda di 7:40 di mainta cu un Santo Sacrificio di Misa na Parokia Inmaculada Concepcion celebra pa pastoor Jairo, y transmiti via Facebook-page di e misa aki.

Tur aña SKOA ta tuma un dia den e temporada aki pa tur trahadonan cu ta cay den e fundacion di scolnan Catolico aki. Nan ta alrededor di 740 trahado. Ya cu e aña aki e Dia di Reflexion ta virtual for di nan scol nan ta bay celebra y tambe reflexiona. Pastoor Wuilder hunto cu su team di IKD-Aruba ta bin cu un mensahe caminda nan ta bay reflexiona kico e aña aki tabata pa nan.

Satisfecho

Sra. Lisi Werleman-Paris kende ta staffunctionaris di SKOA a declara na Bon Dia Aruba cu nan ta hopi satisfecho con e situacion aki ta bayendo.

Tambe el a bisa cu nan ta “hibando un control hopi stricto for di e ora cu nan ta yega te ora cu sali di scol pa cu higiena.” Sra. Werleman-Paris a indica cu practicamente nan no a haya niun caso di scol. SKOA tin un poblacion rond di 9.600 studiante den nan 46 scol. E ta kere cu un 98% di nan ta bayendo scol actualmente. Ya cu ainda tin algun mayor cu tin un miedo.

Segun Sra. Werleman-Paris di parti di SKOA nan ta haci nan maximo esfuerso pa splica e mayornan cu nan ta dunando hopi di nan parti pa nan por tin tur cos na luga. “Y e ta asina tambe! Pasobra no tin niun caso di contagio na scol mes,” el a bisa.

E ta reconoce cu semper ta keda cierto persona cu nan propio escogencia tin miedo, caminda pa un of otro motibo, nan no ta manda nan yiu na scol. Pero actualmente mayoria di mucha ta asistiendo na scol.

Na cuminsamento ora cu e medidanan a wordo flexibilisa gradualmente, locual a permiti tambe cu studiantenan por bay scol bek, tabata existi un ambiente di miedo. Pero di parti di SKOA, nan a traha hopi di cerca cu departamento di Salubridad Publico (DVG), caminda tur e 46 scolnan di SKOA a haya bishita di nan personal.

Nan a traha un lista di control caminda cada scol mester a cumpli cu cada regla relaciona cu e parti di higiena. Tambe nan a pone poster cu indicacion riba con pa evita e plamamento di e virus.

Igualmente nan dokternan di scol ora cu SKOA a ripara cu e mayor tabatin cierto miedo, e cabesante tabata indica esaki na e dokternan. Di e forma aki nan tabata tuma contacto cu e mayornan.