Awe hues ta tuma un decision den e caso di periodista Nelson ‘Speed’ Andrade contra parlamento y e decision pa suspendi periodista for di parlamento pa un periodo di tres luna. E tratamento a tuma luga ayera.

Hues na dado momento a pusha riba abogado den defensa di parlamento pa claridad y pa splica e base for di unda por a dicidi pa sanciona e periodista.
E abogado representando Speed, David Kock, a trece dilanti den corte cu presidente di parlamento no tabata tin ningun base/autoridad concreto pa sanciona e periodista. Na dado momento hues mes a cuminsa pusha riba esaki pasobra pe mes esaki no tabata mucho cla. Segun presidente di parlamento Ady Thijsen, hues ‘a miss the point’ pasobra ta a base di articulo 82 parlamento tin e autorisacion pa tuma cierto decisionnan.

“Mi ta respeta hues riba su decision, democracia. Nos ta wak si nos ta bay apela of no pero esey mi no ta bay bisa awo”, el a declara ayera despues di e tratamento di caso. E situacion ta ‘hopi simpel’ segun e presidente di parlamento. E prome carta cu parlamento a manda tabata pa 24ora.com y no directo na Speed, sr. Thijsen ta trece dilanti. Tur cos a escala ora cu e periodisata a bay riba su radio y cuminsa papia cu entre otro ‘e por drenta parlamento ki ora cu ta via di su hendenan di partido AVP’, segun e.

Esaki a wordo treci dilanti den corte ayera unda cu e hues atrobe a pidi aclaracion pasobra no tabata cla tampoco unda e situacion a escala; si ta pasobra Speed a sinta riba stoel di presidente di parlamento pa haci su reportahe. Of si tabata pasobra el a bay expresa su mes den su programa di radio despues cu 24ora a haya un carta como recordatorio pa tene cuenta cu reglanan den parlamento. Na ningun momento a bin cu ningun regla nobo segun defensa di presidente di parlamento a trece dilanti.

‘Parlamento tin su reglanan’
Presidente di parlamento Thijsen ta enfatisa cu henter e asunto aki ta pasobra e periodista a no solamente yega drenta manera cu e kier den edificio di parlamento, pero el a bay na radio comenta cu e por ‘haci kico cu e kier’ eynan. “Andrade a bay riba radio y bisa cu nan a sancion’e mientras cu no ta berdad. Di dos e ta bisa cu ningun hende ta bay bis’e si e por drenta parlamento si of no. Nos tin articulo 82 cual ta e unico cos cu nos tin cu ta bisa cu mi por stel regla. Kiermen ken cu ta, nos tin cu haci algo y no warda pa cos pasa.” El a bisa cu e periodista a drenta for di porta di patras. A bin dilanti den corte ayera cu ningun trahado di siguridad a wak e drenta mientras e mester meld su mes dilanti ora di drenta.

Na otro banda abogado Kock a trece dilanti cu esaki ta incorecto pasobra e dia ey Andrade tabata tin un entrevista cu lider di fraccion MEP Rocco Tjon, kende ta esun cu a lag’e drenta parlamento.

“Nos no a haci nada riba esey pa motibo cu ta libertad di prensa. Pero pa motibo cu el a menasa, cual e sa esey tambe, bahando riba parlamentario Ricardo Croes den un manera masha vies mes. Esaki ta bay como funcion di presidente di parlamento pa trece ordo, e no ta bay pa Ady Thijsen. Cu e por haci kico e kier asina nos no por laga e cos aki pasa. Si e cos aki wordo aproba mañan tur hende por hacie”, sr. Thijsen ta haya. E presidente ta bisa cu e periodista sa masha bon di e reglanan pero cu por ta nan a custumbr’e malo caminda cu e por awo drenta unda cu ta y ‘haci kico cu e kier’.

E presidente ta bisa cu e punto di articulo 82  depende con bo ta lesa esaki segun e  ta trata mas bien riba e ordo general di henter e edificio di parlamento y no djis e sala. “Nos no a sancion’e pa kico el a haci na prome instante. Ta ora cu el a menasa riba radio cu ningun hende ta strob’e di drenta. Tur cos tin regla, tur hende mester sigui regla. Bo no por haci e na gobernador, bo no por haci e na corte, pakico si parlamento?” Articulo 82 ta stipula cu presidente di parlamento por bin cu regla pa loke ta pasa den e sala y tambe ta conta pa otro bishitantenan segun sr. Thijsen a trece dilanti.

‘Presidente ta bruha regla y sancion for di otro’
Abogado David Kock a reacciona na e comentario di presidente di parlamento despues di e caso cu na Aruba ta mustrando manera nos tin un anarkia, e ta pensa ta bon pa mas miho no tin un dictadura. “Pasobra ta tristo cu ta wordo reconoci akinan cu pasobra un periodista a bisa cosnan cu e presidente di parlamento no a gusta, e ta purba mascara esaki como menasa”, e abogado ta bisa. Sr. Kock a sigui bisa cu locual aparentemente presidente di parlamento ta tumando hopi na pecho ta e hecho cu Speed ta bisa di antemano cu e por drenta parlamento toch. “Esaki no ta un menasa. E ta duna un otro nificacion na loke miembro di prensa ta bisa cual ta parlamento ta cas di pueblo y e ta. Presidente di parlamento ta bruha ley y sancion for di otro.”

E abogado ta subraya cu ley ta bisa cu bo por traha regla pa locual ta pasa pues paden di Staten y no pafo. “Regla no por ta cu pasobra pafo di Staten bo bisa algo cual ta conta pa tur boso nan como periodista mañan tambe cu locual bo bisa of skirbi pafo di Staten por wordo uza como motibo di pensa cu mi tin cu saca bo pafo di Staten”, e abogado a comenta. “E regla ta cu Staten ta publico y naturalmente bo no por bay djis drenta e sala di fraccion pero na e area di publico, e ciudadano di Aruba mester por drenta na cualkier momento. Ley ta bisa cu te ora un hende pa den ta stroba ordo bo por sak’e pafo, pero bo no por straf e.”

E ta sigui cu: “Manera presidente di parlamento a bisa el a haci e pa e manda un señal pero ley no ta para pa e presidente manda señal.” Presidente di parlamento mester lidera ley den Staten, reunionnan publico, hendenan cu ta stroba ordo publico bo ta saca afo segun Kock ta expresa. Y no un periodista cu ta drenta via protocolnan oficial pa haci su trabao.