Awe reunion publico riba incinerator chikito Hendrik Tevreden: Miho ministernan di POR retira temporalmente

Awe cu lo tin un reunion publico, sin presencia di minister di Desaroyo Teritorial, Infrastructura y Medio Ambiente, pero si di e director di DOW, Sr. Marlon Croes, tocante e proyecto controversial di incinerator chikito.

Parlamentario Hendrik Tevreden a trece su opinion personal, caminda e ta kere cu ta preferibel pa tanto minister Marisol Lopez-Tromp y minister Andin Bikker, kiermen ambos minister di partido POR, tuma nan retiro temporalmente.

El a referi cu na Corsou a presenta un caso similar cu minister Martina, cu a tuma un retiro temporal pa duna espacio pa bin cu un investigacion. Despues cu e investigacion a bin cla, e por a drenta den su funcion y continua goberna.

Aworaki tin discrepancia cu mester di claridad, entre nan dicon a tarda 6 luna pa e casonan di corupcion bin dilanti, segun parlamentario Tevreden.

E ta haya cu e punto aki so ta base pa cuminsa un investigacion. E ta considera prudente pa ambos minister por presenta nan retiro temporalmente pa duna espacio pa bin cu e investigacion aki. Pero di otro banda un investigacion mester bin riba e parti di proyectonan relaciona cu caso di corupcion y cu minister Lopez-Tromp a trece dilanti, caminda algun di nan ta resorta den e ministerio di Sr. Bikker.

Reunion

A pesar cu parlamento ta den receso, nan lo sigui haci algun reunion relaciona cu e trabao di control, pero tambe pa trece mas claridad y trankilidad den pueblo. E prome ta ariba DOW tocante incinerator chikito cu a cuminsa haci algun test. Como Parlamento nan kier sa ken a duna a autorisacion pa cuminsa haci e test aki y dicon nan a scoge pa haci e testnan aworaki. Pero pio ainda, cual ta e rason cu nan a cuminsa pa haci uso di e incinerator aki, sin cu esaki ta cla ainda pa wordo getest, entre otronan.

El a bisa cu ta un serie di reunion pendiente e siman aki. E ta haya cu ta importante pa nan sa di e directornan y tur esnan cu ta den departamento, riba e tipo di casonan di corupcion cu a sali afo durante e reunion cu a tuma luga cu minister, Marisol Lopez-Tromp, siman pasa. Ya cu riba e presupuesto cu cada director ta haya ta bin poni tur trahado cu ta wordo acepta den nan departamento. Nan kier sa tambe dicon e minister anterior, Otmar Oduber, no a trece e documentonan cu su sucesor si a yega di denuncia, pa nos organo legislativo por ta na haltura di nan. “Nos tin di sa di nan kico ta e rason cu nan no a reclama y cu nan no a actua. Y kico e rason cu nan tambe a warda te cu awor,” el a bisa.

Segun e parlamentario, nan kier sa e motibo, sea cu e minister a silencia nan of cu e mesun director no a haci su trabao debidamente. Entre otro, dicon e persona no a yega na trabao. Bon Dia Aruba a trece dilanti den su edicion di diasabra ultimo cu minister Lopez-Tromp a splica entre otro e problema di salarionan halto pa personanan cu nunca el a mira, y kendenan supuestamente lo tabata traha na su despacho.

Sr. Tevreden ta kere cu si nos kier combati corupcion nos mester cuminsa for di ariba bin abao. Esaki kiermen cu directornan no por keda sinta un banda, sin bisa nada y sin tuma un postura, y “laga nan minister haci of dehaci.”

Igualmente bistiendo su pechi di presidente di MEP, el a bisa cu no tin ningun parlamentario ni minister di nan partido cu a wordo menciona den tur informacion di corupcion cu Sra. Lopez-Tromp a duna den e prome tanda di e reunion di diabierna.