Awe e referendum pa trahadonan di TeleAruba busca representacion sindical for di FTA ta tuma luga entre 3 pa 4or atardi na oficina di Mediador di Gobierno.
E referendum aki ta wordo celebra despues cu un acuerdo of protocol a wordo firma entre representa legal di gerencia di TeleAruba y representante di FTA den presencia di Mediador di Gobierno, Anselmo Pontilius. Den e reunion aki ambos partido a papia hopi cla riba e diferente situacion cu nan mester atende cu ne.
Pa asina nan por acelera e proceso pa e negociacion di un eventual contracto colectivo (CAO), condicionnan di trabou y tambe con pa atende cu e kehonan cu e trahadonan tin. Pero esaki ta depende si FTA ta haya reconocimento den e referendum awe.
Tur cos ta indica cu sindicato FTA ta haya awe e sosten di e mayoria di trahadonan di e planta nacional di television pa representa nan. Esaki mester ta e caso, ya cu for di alrededor di 18 trahado, FTA tin sosten di firma di 14, pues tin mayoria. Pero toch tur cos ta depende di e resultado final di e referendum aki.
