Awe ta tuma luga e prome referendum organisa pa departamento di Mediador di Gobierno, despues cu e medida di shelter in place a wordo kita. Departamento di gobierno a cuminsa duna nan servicio bek durante e di 2 fase di flexibilidad di actividad economico.
E referendum aki a wordo pidi pa sindicato STA, caminda sindicato FTA tambe ta bay participa den dje.
Mediador di Gobierno, Anselmo Pontilius, a bisa cu sindicato STA a pidi un referendum pa varios departamento pa trahadonan di aeropuerto (Triple A N.V.). E referendum ta tuma luga awe 28 di mei den oranan di mainta, caminda diferente grupo ta participa den dje. Ta wordo spera cu ya den oranan di merdia e referendum aki ta bin cla pa cinco departamento di aeropuerto: charlie charlie, ASU, AMU, Security y Landside.
Mediador a reuni cu tur parti envolvi, prome cu e crisis y despues cu e medidanan a bira mas flexibel, pa cumpli cu loke ley di referendum ta stipula.
Pontilius a explicita cu e referendum a wordo pidi prome cu e crisis di e coronavirus/Covid-19 a dal nos pais. Den e sentido cu si no tabatin e medidanan introduci pa evita e contagio di e virus den nos comunidad, ya e referendum por a tuma luga caba. Pero unabes cu e crisis a surgi cu tur su consecuencianan e referendum a wordo posponi, y esaki ta tuma luga awe.
Mirando cu ainda aeropuerto no ta operacional tabatin peticion pa cambia e fecha di e referendum. Pero Mediador di Gobierno a dicidi pa esaki tuma luga den nan sede situa na Dr. Henriquezstraat 19. Nan a bini cu un serie di orario pa diferente grupo y pa diferente departamento cu nan trahadonan ta bay participa di e referendum aki.
Igualmente Pontilius a bisa cu nan ta tene cuenta cu tur regla di higiena y distanciamento social cu ta wordo exigi di parti di autoridadnan di salubridad publico (DVG).
Nan a bin cu diferente orario tambe pa evita aglomeracion di hende na e mesun momento. Segun Mediador di Gobierno nos ta papiando di alrededor di 110 trahado reparti den cinco departamento.
“Esey no kiermen cu tur departamento ta bay vota den e mesun momento, sino cu tin orario stipula for di 8’or di mainta te por lo menos 2’or di merdia.”
E resultado di e referendum ta wordo conoci awe mes. A pesar cu e situacion actual di Covid-19 ta afectando tur compania y tur empresa, e derecho di e trahadonan ta keda, y e derecho pa trahadonan busca representacion sindical pa medio di un referendum ta un di nan.
