Sindicato STA a pidi un referendum pa e trahadonan di departamento di operacion di e compania ASTEC cu ta atende cu carga na waf di Barcadera.
E referendum ta tuma luga awe for di 3:30pm te cu 4:30pm den e sede mes di oficina di Mediador di Gobierno. E ta un orario cu a wordo palabra internamente pa asina facilita e trabou cu nan ta realisa ariba waf durante dia. Ta asina cu den oranan di atardi e trahadonan den tur trankilidad por eherce nan derecho di voto, sin perde pago di acuerdo cu e ley di referendum.
Actualmente e mayoria di trahado ta afilia na sindicato Union Portuario Arubano (UPA); pero un ambiente di malcontento ta existi cerca un grupo di trahado cu a pidi sindicato STA pa solicita un referendum. Sindicato UPA tambe a informa cu nan ta participa den e referendum aki.
Mediado di Gobierno, Anselmo Pontilius a declara na Bon Dia Aruba cu STA a cumpli cu e rekisitonan legal y tur cos a cana su caminda debidamente, te hasta e anuncio tocante e referendum a keda publica tambe.
Awe tardi e trahadonan tin oportunidad pa vota, ya sea pa sindicato UPA of pa sindicato STA. E ta un lista di alrededor di 42 trahado cu tin derecho di voto. E resultado di e referendum aki lo ta uno importante pa sindicato UPA su historia, ya cu e lo determina si UPA ta sigui representa e mayoria di e trahadonan di waf. UPA a keda funda na aña 1960 entre otro pa Edgard Maduro, Juan Cansio Boekhoudt y Albertico Rincones cu e meta di representa specificamente e trahadonan di waf.
Un referendum historico pa UPA
Si den caso cu sindicato STA logra e mayoria, no necesariamente ta nifica UPA su morto sindical pero sigur e ta keda debil. E sindicato aki tin su statuto y reglamento; eventualmente tin trahadonan cu ta keda miembro di e sindicato; y consecuentemente nan ta keda cu nan derecho legal di existencia ya cu den ley tampoco no ta existi un limitacion di cantidad di miembro minimo pa mantene un sindicato existente. “Si tin un miembro, tin un miembro; y si e ta cumpli cu statuto y reglamento di e organisacion, e ta keda na bida”, segun Mediador di Gobierno.
Sinembargo no ta usual cu bo ta haya un sindicato masha chikito di miembronan, ya cu logicamente e no ta un situacion practico. Den seno di un organisacion sindical ta existi e dinamismo di eligi directiva di un forma democratico entre nan miembronan.
Di otro banda, no ta cla con nan lo atende cu e exigencianan di nan miembronan pasobra pa ley, e dunado di trabou ta obliga pa negosha cu e sindicato cu tin e mayoria representativo.
Sr. Pontilius a relata cu a yega di sosode cu e dunado di trabou ta dicidi pa negosha cu e sindicato mayoritario pero nan ta respeta tambe e sindicato minoritario tambe. “Pero esey ta un escogencia di parti di e compania semper”, e mediador a declara.
