Awe miembronan di Parlamento di Aruba ta vota pa presidente y vice presidente di parlamento pa e aña parlamentario 2024-2025. Manera ya caba Bon Dia Aruba a publica, algun parlamentario a anuncia cu nan no lo ta sosteniendo e presidente actual di parlamento, Edgard Vrolijk di fraccion MEP.

Recientemente parlamentario y lider di fraccion ACCION21, Miguel MAnsur, a publica un video ariba su pagin oficial di Facebook den cual e ta critica e e trabou cu e actual presidente di parlamento Vrolijk, a eherce durante e aña parlamentario cu a caba di pasa.

Den e video Mansur ta remarca cu e kier trece na atencion di pueblo e falta di respet di parlamentario Edgard Vrolijk y su fraccion MEP pa e organo mas halto di e sistema constitucional y democracia di pais Aruba.

E parlamentario a menciona cu seis carta a wordo manda pa su excelencia Gobernador di Aruba den cual miembronan di parlamento ta keha con e presidente actual di parlamento a viola structuralmente e reglement van orde y Constitucion di pais Aruba. Un di e cartanan, el a indica, su mes a manda pa tanto su excelencia gobernador di Aruba como tambe pa Eerste y Tweede Kamer documentando tur hechonan aki.

“E falta di respet cu un solo persona por mustra henter pueblo di Aruba door di mina confiansa den parlamento, operacion den parlamento, door di abusa su poder como presidente cu ta un puesto temporario cu e tin e honor di ocupa,” Mansur a subraya.

E lider di ACCION21 a pone atencion na dos carta, un cu a wordo firma dia 21 di maart pa parlamentario y lider di fraccion RAIZ Misha Raymond, cu ta categorisa tur e abusonan di Sr. Vrolijk y den cual e ta bisa cu e no ta digno pa ta presidente di parlamento.

Otro carta cu el a destaca ta uno cu fecha di 21 di februari firma pa su persona, pa parlamentario Raymond y parlamentario di fraccion RAIZ, Raymond Kamperveen den cual nan ta bisa y pidi e presidente di parlamento pa atene su mes na e reglement van orde y constitucion despues di no haci esaki.

Parlamentario Mansur a sigui indica den su video cu Sr. Vrolijk su comportamento no a caba. El a splica cu miembronan di parlamento a haya tres siman pa repasa e presupuesto 2025 di gobierno, pero pa e ley di matrimonio igualitario nan a duna seis luna pa repas’e. El a resalta cu nan (referiendo na presidente di parlamento y su fraccion) no tabata kier pa e ley di matrimonio igualitario yega sala di parlamento pasobra e mester a bay comision.

Pero presupuesto di pais Aruba no ta bay ningun comision y segun Mansur ta indica, e presidente di parlamento no kier pa parlamentarionan haci nan debido trabou di controla gobierno pasobra e no ta cumbini e partido di e presidente, esta MEP, y haciendo esaki e ta priorisa e interes di su partido, locual ta igual na pone interes personal prome cu interes nacional y esey no por wordo acepta.

“Esaki ta e momento di berdad pa Misha y Raymond Kamperveen mustra pueblo si nan ta para pa integridad of no. Mi ta conta riba Sra. Raymond y Sr. Kamperveen pa dialuna mustra cu boso tin integridad. Tur fraccion den parlamento, cu excepcion di MEP, a keha y categorisa Sr. Vrolijk su abuso di poder cu a kibra ley, cu a kibra reglement van orde, dus awo ta ora pa mustra cu boso ta para pa integridad y cu boso no ta acepta e fechorianan ‘ki,” parlamentario Mansur a finalisa.

Otro parlamentario cu tambe ta critica fuerte- y abiertamente e comportacion di e presidente actual di parlamento, Edgard Vrolijk, ta parlamentario independiente Gerlien Croes. E parlamentario independiente a indica, mediante un comunicado di prensa, cu Vrolijk “a coba su propio graf faltando respet pa e institucion di parlamento.”

Den e comunicado e Croes ta menciona cu den luna di mei di e aña aki el a bolbe denuncia e deficiencia den liderazgo di Parlamento di Aruba na man di presidente Edgard Vrolijk. El a indica cu no tabata trata solamente di loke publico por mira ora di reunion, pero tambe durante reunion di porta cera ora cu Vrolijk ta demostra cu e no tin etica ni respet pa sinta na cabes di e entidad mas halto di pais Aruba.

Pa loke ta trata votamento pa presidente y vice presidente di parlamento awe, el a remarca cu e ta considera cu loke ministernan di MEP a haci di hiba campaña ariba rednan social pa sostene Vrolijk, como un “atake demostrativo contra e democracia di Aruba” door di publicamente demostra nan apoyo pa un candidato pa presidente di parlamento, locual e parlamentario independiente ta expresa, ta confirma cu e gobierno actual tin e poder ehecutivo y e legislativo secuestra

Papiando di su propio experiencia, Croes ta splica cu el a experimenta hopi falta di respet. “No ta desconoci cuanto biaha el a silencia miembronan. Na varios ocasion ta paga microfon ora cu mi ta hibando disertacion of tin punto di ordo. E ta manera cu nos a pasa pa un sistema autoritario y comunista pasobra ta un partido ta hiba gobernacion, pero tambe tin Parlamento di Aruba full bou su maneho,” el a remarca.

E parlamentario independiente a sigui splica cu pa tres aña largo tin un partido cu ta acepta e comportacion aki, referiendo na partido RAIZ. El a resalta cu for di contract di Eagle LNG te na matrimonio di mesun sexo, RAIZ tabatin caba mil motibo pa tuma un posicion pero nunca a haci esaki.

Mirando e informacion cu tabata circual riba otro medionan pa loke ta trata votamento di awe y si partido RAIZ ta bay sostene e actual presidente di parlamento of no, Bon Dia Aruba a ricibi confirmacion diabierna ultimo for di vocero di fraccion RAIZ, sr. Raghnall Bermudez, ken a indica cu Raiz no lo ta votando pa Sr. Edgard Vrolijk pa presidente di parlamento.

“Raiz a laga sa na MEP cu no lo sostene Edgard dialuna awo. Nan lo sostene cualkier otro miembro di fraccion MEP. Y awo nan ta bezig ta wak con lo sigui pa dilanti,” e vocero a indica.

Tin hopi expectativa alrededor di e votamento di awe y ken lo bira e siguiente presidente y vice presidente di parlamento, sobretodo den sentido di ki efecto e resultado di votamento lo tin riba coalicion.