Awe prome cu Parlamento ta bay den reces entrante mañan, ta wordo trata e ley di presupuesto complementario.
Minister di Finanzas y Economia, Xiomara Ruiz-Maduro ta spera cu por haya cooperacion di tur fraccion den parlamento, pa asina nan por pasa e presupuesto complementario di 2019.
E mandatario a declara na Bon Dia Aruba cu recientemente, kiermen luna pasa, el a bin parlamento pa asina nan indica den un nota di fin di aña, kico ta e cambionan cu por wordo premira den e presupuesto 2019. Tin cambionan, pero nan mester wordo concretisa pa medio di apoderacion di Parlamento.
“Algun cambio mester wordo haci, pero e ta keda e mesun suma. Hasta e ta miho, ya cu e deficit ta mas chikito…” el a bisa.
Reforma fiscal.
Pa loke ta trata e cambionan riba e ley di reforma fiscal, cu ta un preocupacion cu e gremionan comercial di sector priva a yega di vocifera, esaki no lo wordo trata e aña aki.
Ruiz-Maduro a splica cu door di e retaso presenta, e ta lamenta cu nan no a logra trat’e den parlamento. Actualmente e concepto di e reforma ta den Raad van Advies (RdA) pendiente di nan conseho. Pero considerando cu e organo consultativo tambe ta bay cu reces, no ta posibel mas pa e reforma fiscal bin cla e aña aki.
E mandatario a informa cu lo trata e reforma fiscal na januari y e ta spera cu esaki ta wordo trata hunto cu presupuesto 2020.
“E presupuesto ta tambe na loke ta wordo yama e caminda huridico. E ta den e proceso ey,” el a expresa. Pues tanto e cambionan den e reforma fiscal como presupuesto 2020 lo wordo trata y aproba na januari awor na Parlamento, segun e minister.
Encuanto e cambionan cu a wordo introduci den e reforma fiscal, el a splica cu nan ta cambionan cu ta ‘begunstig’, kiermen cu bo tin un beneficio cune. “E no ta algo cu ta perhudica bo, pero e ta yuda bo,” el a bisa.
Durante su declaracion na Bon Dia Aruba, Ruiz-Maduro a delanta algo riba cierto cambio cu lo faborece gremio comercial.
Beneficionan.
E mandatario a splica cu pa comercio tin den dje e parti di e ‘afkoopregeling’ pa bo pension. Ta asina cu ora bo ta cumpra bo pensioen, bo por hay’e na un belasting mas abou. Pronto esaki lo wordo anuncia oficialmente. E ta haya cu e tipo di estimulo aki ta yuda e sector di comercio. Gobierno kier delanta riba e parti aki di e ‘afkoopregeling’ pa bo pension for di 1 di januari, prome cu e ley pasa.
E di dos tin di haber cu nan a baha e inkomstenbelasting. Ora e comerciante ta saca su dividendonan for di su negoshi, e ta paga menos belasting for di dje. E mandatario a bisa cu nan a hacie na 2019 y nan lo bay prolong’e pa 2020. Nan tambe ta cambionan cu gobierno ta anticipa prome cu e cambionan den e ley di reforma fiscal lo tuma luga otro aña.
Nan ta cambionan cu e ta haya cu ta faborece nos sector comercial y cu e ta anuncia awor cu anticipacion. Pero e restonan ta bini, ora cu e cambio di ley di reforma fiscal lo wordo trata entrante otro aña.
Tardansa.
Asina tambe e kier kita e preocupacion cu e sector comercial a yega di vocifera, di un supuesto ‘fastball.’ E mandatario a bisa na e matutino aki cu e tin full comprension pa e sector priva, y den e caso aki e gremio comercial cu a bin dilanti. El a declara cu a tuma contacto cu directora di Atia, Michelle de Groot, pa dun’e un splicacion dicon e no a reuni cu nan.
“Tanten cu mi no tin e producto di ley den mi man, mi no por bisa bo of yama bo pa papia, pasobra bo ta bay pidi mi detaye cu mi no tin”, el a bisa.
Un motibo cu el a trece dilanti ta cu a bin tardansa den e parti legislativo, ya cu cierto decision no a wordo tuma na tempo di parti di gobierno. E tardansa ta debi cu nan tabata buscando ‘otro avenidanan’ pa logra e entrada necesario. “Un cos cu ta cla, ta cu Aruba mester di e fondonan,” el a bisa. El a splica cu cada bes cu nan ta busca alternativa, nan mester haci cierto calculacion cu ta haci cu e proceso ta tarda, ya cu nan no ta calculacionnan facil.
E ta argumenta cu esaki tabata e tardansa cu tabatin, pero niun momento pa pasa ‘fastball’, pasobra si tabatin un mal intencion asina, nunca gobierno lo a yama pa bin cu un stakeholder meeting.
