Awe ley di Loonsubsidie lo wordo trata den Parlamento di Aruba, un ley importante pa motibo cu CAft a manda pidi e controlnan necesario algun lunanan pasa pa asina e companianan cu a haya fondonan di mas tin cu paga e placa ey back.
Asina minister di Finansas y Cultura Xiomara Maduro a informa den su ultimo conferencia di prensa tocante finansas publico y tambe a indica cu pa e cobramento ey tin mester di un ley cu lo wordo trata awe den parlamento cu manera el a sigura, ta pa legalisa full e proceso di emergencia e cual nan a brinda e asistencia aki , ta p’esey cu e mester wordo trata den parlamento.
Ademas, el a señala cu esaki lo duna e marco e legal y den dje tambe SVb ta haya e autoridad pa haci e cobransa necesario, el a bisa cu nan a haya un indicacion di lo cual ta SVb cu ta bisa unda ta concentra e placa grandi, na ki luga esey ta, na unda cu nan a mira cu esey ta principalmente den hotelnan cu a indica cu nan tabatin mester di placa y ora a haci e control e no tabata asina.
“E maneho cu nos lo bay hiba ta pa cobra e sumanan grandi pa brinda un alivio na lo cual ta e companianan chikito cu nos sa cu ta precario ainda, e cobramento ey lo bay di un manera balansa pero prome cu tur cos nos ta busca e base legal”, Maduro a declara.
Tambe el a menciona cu den esaki ta importante cu ora mas e companianan tabatin mester, tabatin e yudansa akinan, “sin e yudansa aki, hopi compania no lo tabata opera, kiermen e yudansa tabata t’ey pero tur cos tin reglanan y e control ta dicta cu ta Hulanda su placa y e ora ey nan tin extra control riba dje den e cual CAft a pidi pa cobra esey akinan y integra esaki den administracion di pais Aruba”, Maduro a bisa
Mirando e situacion aki, lo por tin algun companianan cu por bay den bancarota debi na nan estado financiero pa lo cual minister Maduro a señala cu si no tabatin e yudansa aki hopi compania no por a keda habri pa motibo cu nan a perde tur entrada, tin otronan cu prome cu pandemia ya caba nan tabata den problema financiero y tambe ta haya otro companianan cu aunke nan a haya e yudansa, nan no por a haci e cambionan necesario pa por keda opera den un situacion di pandemia, e bista di esey tin cu premira cu lo por tin companianan cu no lo sobrevivi.
Di mesun forma, el a bisa cu SVb a indica cu nan no ta espera hopi di e compania ey for di informacion cu nan tin, pero e ta keda un scenario cu por tuma luga, pa loke ta trata e cobransa SVb tin un bista unda ta esunnan cu mester paga back y den e parti aki nan ta bay cobra en bes di esunnan cu ta e companianan chikito.
“Pero un cos sigur, e cobransa ta wordo haci na SVb, ya caba e cobransa a cuminsa na unda nan ta haya un betalingsregeling pa nan por cumpli cu e pago” el a finalisa.
