Awe nochi for di 7or te cu 10or, lo tin otro actividad na Biblioteca Nacional Aruba, George Madurostraat, Oranjestad, dedica na Rescate di Memoria: ‘Pasobra bo tambe ta conta’. Awe nochi ta rindi tributo na personanan cu a nifica hopi pa nos pais Aruba.

Biblioteca Nacional Aruba, Departamento di Cultura Aruba hunto cu gestor cultural Mirto Laclé lo presenta un programa multidisciplinario cu enfoke riba e diferente disciplina di literatura, arte, cultura, linguistica y educacion en general.

Segun Mirto Laclé, a yega ora pa honra un grupo di persona cu a destaca di un forma masha significativo pa loke ta musica arte, canto y diferente expresion artistico pa e pais Aruba y asina hiba e nomber di nos isla mas aya.

E actividad aki lo tin invitadonan special y lo duna reconocemento na algun musico y artista local, entre otro Taly Wever, Ronny Kock, Johnny Scharbaay y Frank Williams. Tambe lo presenta diferente documental. P’esey tur cuater cu ta forma parti di e actividad cultural aki, ta bay keda honra di un forma significativo pa nan trabou cu nan a haci. “Un forma di nos pa gradici nan,” Laclé a bisa.

Tambe lo presenta un documental produci pa George Jacobs y Mirto Laclé, esta ‘Na caminda pa un centenario y celebracion centenario di Jose ‘Jo’ Dania’. Dia 5 di october ultimo, Jo a cumpli su centenario, y pa medio di e documental aki, nan lo presenta loke Mirto Laclé a cualifica como un trilogia di e personahe su bida como reciclado. Tambe na momento cu el a entrega un cuadro na BNA como recuerdo. E di tres ora cu Jo ta recorda algun cantica y wega di infancia. “Den tur adulto tin un mucha. Y akinan Jo ta hiba nos mustrando su mannan y e ta haci wega cu e cancion di cuna,” Laclé a declara.

Artistanan.
Taly Wever ta un musico, artista, cantante: un ‘embahador’ trobado cu a aporta cu su talento tanto na Aruba como den exterior, den Caribe, Sur America te Italia.

Ronny Kock ‘El ruiseñor de Savaneta’: Musico, artista, cantante, compositor, fundado di stemband Jumping Jewels y coach di diferente grupo di stemband na Aruba. Ronny a cultiva diferente genero di musica y tambe a desaroya diferente sorto di instrumento. Su aporte na transferi conocemento na otro pa asina continua deleita otro cu su musica, ta di balor significativo. Kock ta un bolerista y guitarista kende a yega di skirbi composicion pa Voz-i-Landia.

Johnny Scharbaay ta un musico, pianista virtuoso, cu a sali for di e cuna di famia Camacho di Savaneta. Johnny Scharbaay, icono musical Arubano cu a dedica un bida na studia y investiga musica. Tambe el a actua como musico pianista tanto local como internacional, pa huespednan distingui y di Cas Real y cu bandanan di taya universal.

Frank Williams, maestro, docente di idioma den enseñanza secundario, educador, actor di teatro y poeta. Frank Williams a contribui cu enseñanza di Aruba tanto dilanti di klas, como inspector di enseñanza, observador y dirigente. El destaca como artista di teatro y a skirbi algun obra di teatro.

El a compila poema , a traduci na Ingles y a skirbi historia di poesia, Isla di mi, cu ayudo di Wim Rutgers. E anochi aki nan a hiba combersacion cu William kende a traha algun composicion poetico. Tambe lo presenta imagen graba di Rooi Manonchi, unda William ta aparece con su amigonan, dunando un bista di e rooi aki cu semper ta bira famoso ora awa ta cay pisa riba nos isla.

Awe nochi Laclé ta invita tur persona interesa na Biblioteca Nacional na Playa, caminda lo tin musica, canto, baile, declamacion y poema filma acompaña cu imagen di Rooi Manonchi. E acto aki tambe ta wordo organisa den cuadro di Dia di La Raza of Columbus Day, pa mustra un perspectiva distinto pa loke ta e parti di hemisferio Americano cu nos ta biba. Tambe e acto aki ta tuma luga den luna di october caminda Misa San Francisco ta cumpli su shen aña.