Diadomingo awor ta wordo conmemora Dia Internacional di Lenga Materno cu ta wordo dedica na e di 400 aniversario di e nacemento di e gran escritor Manuel de Cervantes Saavedra autor di e buki “Don Quijote”.
E biaha aki Biblioteca Nacional Aruba (BNA) a dicidi di adelanta e celebracion aki pa duna contenido na e fecha importante di idioma materno. Pa tal motibo awe 18 di februari, BNA conhuntamente cu departamento di Cultura Aruba (DCA), Instituto Pedagogico (IPA) ta organisando actividad cultural masha atractivo cu ta cuminsa pa 7’or anochi den nan sede di Oranjestad.
E linguista y promotor cultural, sr. Mirto Lacle a informa cu e ta un actividad cu ta consisti di dos parti: E prome ta wordo dedica pa conmemora 100 aña di e natalicio di George Maduro. Awe nochi e ciudadano sr. Raymond Maduro lo bay papia riba e personahe historico aki cu ta un heroe di II Guera Mundial cu a nace na Corsou, y cu na su honor a wordo batisa e caya unda BNA-Oranjestad ta situa actualmente.
E di dos parti lo wordo dedica specificamente na e celebracion di Dia Internacional di Lenga Materno. Nan lo papia entre otro riba e buki dedica na e autobiografia di e gran linguista sr. Antoine Maduro, kende a nace na Aruba, pero cu a biba na Corsou. E persona encarga cu esaki ta sr. Sidney Joubert kende ta un bon linguista y un bon amigo di Aruba. E tabata e persona responsabel pa culmina e obra auto biografico dedica na e feliz memoria di sr. Antoine Maduro.
Tambe awe nochi lo tin presencia di un invitado special, Prof. Armin Schwegler kende lo papia di Aruba, Bonaire y Corsou y e posibel origen di e lenga crioyo. Prof. Schwegler ta un catedratico conoci rond mundo y e ta dedica gran parti di su trabou riba e tereno di investigacion linguistico.
Tur hende interesa ta cordialmente invita na BNA pa disfruta di e programa cu a wordo elabora pa celebra Dia Internacional di Idioma Materno. Porta lo ta habri fei 6:45 p.m.
