Awe Minister Presidente, Evelyn Wever-Croes ta biahando Hulanda pa atende un reunion den seno di Conseho di Minister di Reino diabierna awor, unda Aruba ta un biaha mas riba agenda pa un aanwijzing (instruccion di Reino).
E ta bin diasabra bek, despues cu e lo delibera cu diferente persona, entre otro el a pidi un cita cu Staten di Hulanda, manera el a haci na mei ultimo. E ta considera importante pa nan tende for di gobierno di Aruba kico ta pasando riba nos isla.
E ta mira cu tin hopi inkietud den Tweede Kamer con nos pais ta atendiendo cu cierto cosnan. E ta bay no solamente pa papia di finansa di Aruba, pero tambe pa kico gobierno ta considera cu e conseho pa un ‘aanwijzing’ no ta necesario, ya cu nos ta den cumplimento.
Prome cu diabierna yega, premier Wever-Croes tin programa otro reunion na Hulanda pa papia cu minister Raymond Knops y premier Rutten riba e tema di ‘aanwijzing.’ Na opinion di gobierno di Aruba e aanwijzing aki no ta necesario.
E aanwijzing aki ta basa riba dos punto. Un tin di haber cu gasto di personal, ya cu Hulanda ta preocupa si pais Aruba por cumpli cu e meta riba gasto di personal. Hulanda no kier mira e social crisis plan separa for di presupuesto. Gobierno a bisa cu pa 2020 nan ta dispuesto pa hink’e aden di e presupuesto.
E di dos punto tin di haci cu e plan di belasting ya cu Hulanda tambe ta preocupa si e impuesto cu gobierno tin ta suficiente pa cera e deficit financiero.
Minister presidente a bisa cu nan a duna Hulanda mas informacion con e impuestonan ta bay contribui pa cera deficit financiero. Pero e punto di salida di gobierno di Aruba ta cu no ta impuesto so ta yuda cera deficit financiero, sino desaroyo economico tambe.
Mirando cu esaki ta e motibo -segun e prome mandatario- nan ta den deliberacion cu Hulanda pa convence nan cu pais Aruba tambe ta preocupa pa ambos caso.
