Diaranson atardi a tuma luga un accion do protesta na Scol Paso Pa Futuro contra e intencion di minister Armando Lampe pa muda e scol aki na otro localidad na Seroe Blanco y dividi e scol aki den dos.
Den e accion aki nan a argumenta cu e scol aki ta traha cu muchanan special cu mester di cierto structura y metodologia di enseñansa, y no ta facil pa nan adapta cu cambio di localidad. Nan ta haya cu e cambio cu e mandatario aki kier haci lo por afecta e muchanan emocionalmente.
Ayera minister Lampe a declara cu a pidi un dialogo cue cabesante y full e team di e scol aki pa aclaria loke e mandatario a cualifica como “mal entendido of si tin mal entendido al respecto.” E reunion ta tuma luga awe cu e team di Scol Paso Pa Futuro, el a bisa.
Encuanto si e mandatario lo considera pa hala atras e cambio aki, e no a sigura esaki. El a laga cu e punto aki no tabata denter di e discusion di e mocion na parlamento ora cu a wordo trata e cambionan aki. Ademas el a bisa cu nan ta trahando caba riba e ehecucion di e decision aki.
Sinembargo hunto cu Beatrix College y Scol Paso pa Futuro, e mandatario lo bay den dialogo riba e critica cu tin. Igualmente el a laga sa cu den e otro edificio cu tin plania pa nan muda ta bay respeta e necesidadnan cu e muchanan special aki tin. Finalmente den un situacion cu bo no por sali afo, e ta kere cu semper tur escenario por cambia. “Ami ta un minister cu ta habri pa dialogo,” el a bisa.
Sinembargo minister Lampe a bisa cu e tin un aña cu ta dialogando cu e cabesante di scol. P’esey e ta kere cu e argumentonan cu a yega di trece dilanti ta mustra cu nan no ta perhudicando niun mucha cu ta bayendo Scol Paso pa Futuro. “Y nos no ta perhudicando e maestro nan tampoco,” el a declara. Di un banda pa transporte su decision no ta perhudicando niun hende ya cu e scol lo keda den Playa, te hasta nan localidad actual ta cerca di e otro na Seroe Blanco.
