Awe MFA Paradera lo habri oficialmente

Awe MFA Paradera lo habri su portanan oficialmente. Diamars nan instala Bos di Paradera pa entre otro trece solucionnan pa problemanan den e bario.

Esaki ta informacion for di un relato di gobierno:

Diamars anochi a tuma luga e prome reunion di e klankbordgroep di e Acomodacion Multifuncional di Paradera cu ta yama di awo padilanti ‘Bos di Paradera.’

Cada integrante di e grupo a ricibi su nombramento oficial den un Decreto Ministerial for di man di Prome Minister Mike Eman. Inmediatamente su tras y na un manera motiva, e grupo a cuminsa intercambia di idea. Esaki ta dos dia prome cu e apertura oficial cu ta programa pa diahuebs atardi 6:30 y henter e bario ta invita. Gerente General, Elton Hart ta wak cu wowo positivo e aporte cu ‘Bos di Paradera’ na e funcionamento di MFA Paradera.

Hart a splica kico ta e idea di e Bos di Bario: “Loke nos ta desea ta pa scucha kico ta resona den e bario y trec’e na MFA pa wak con nos por haya miho guia y soluciona e situacionnan cu tin den nos bario.” E grupo tin intencion pa cuminsa reuni un par di biaha pa luna y despues ahusta e frecuencia cu transcurso di lunanan. E miembronan cu a instala ta: Carina Boekhoudt-Croes, Patrick Croes, Stella Monsanto, Sigfried Lumenier, Nyree Hart, Julie Kelly y Raymond Croes. Ta bin acerca Emlyn Thiel, Ronny Alders, Gladys Croes, Marisol Krosendijk y Igor Kock cu no por tabata presente.

Por ultimo, e Gerente General ta extende su invitacion pa, como bario uni, celebra apertura di MFA Paradera: “Mi kier a invita henter e pueblo di Paradera y bicindario pa bin 27 di october. Nos ta cuminsa for di 6or y mey di atardi cu un programa te cu 10or. Ministernan lo hiba palabra, pero tambe tin presentacion di Jeon, artista di e bario y como clausura Parranda ta Nos.”