E 3 lider di oposicion a pidi gobernador pa intermedia pa haya tur e documento den cuadro di Citgo. Nan tambe ta keda riba e punto cu no tin niun motibo pa secresia y presidente di parlamento a informa gobierno di esaki.
Tur fraccion, incluyendo esun di AVP a pidi comienso di siman pa haya e documentonan despues gobierno a informa cu lo no duna nan, solamente nan lo haya inzage. E lidernan di MEP, PDR y e parlamentario independiente Marisol Lopez Tromp a protesta. Nan a bay gobernador ayera tambe unda e gobernador interino Ella Tromp-Yarzagary a ricibi nan.
Nan tambe a manda president di parlamento un carta unda a conclui cu despues di analisa di diferente documentonan cu nan si a ricibi, cu gobierno no tin niun motibo pa no duna e resto. Nan ta enfatisa e ta importante pasobra nan mester duna autorisacion como representante di pueblo pa asina gobierno por haci cierto trabou. Nan mester wak kico legalmente ta poni den e contractonan pa despues nan no a duna autorisacion pa cosnan cu no ta mucho cla.
AVP no ta mira problema mas
Aunke lider di fraccion AVP Rene Herdé den e Seniorenconvent tambe a pidi pa haya e documentonan, e ta bisa awor cu AVP no tin problema cu ‘inzage’. E ta di acuerdo cu e punto di salida ta cu parlamento mester haya tur informacion cu ta necesario pa nan tuma un decision riba e contractnan.
Pero di otro banda e ta indica cu esaki no ta nifica cu nan tin cu haya e contractnan pa nan bay cas cu nan pa motibo di confidencialidad. E ta argumenta cu e prohibicion aki pa saca copia di e contractnan no tin di haber cu ta algo secreto, ya cu e ta algo disponibel caba pa e parlamentarionan. “Si e ta secreto nos no mag di wak’e!”, e ta bisa Bon Dia Aruba
E peliger ta cu si informacion confidencial di e compania ta sali afo, e por perhudica e companianan, y e por perhudica henter e acuerdo, segun sr. Herdé.
Critica riba presidente
Bon Dia Aruba a papia cu presidente Mervin Wyatt-Ras tambe riba e criticanan aki cu a wordo lansa contra dje den su funcion como presidente di Parlamento. Un di nan tin di haber riba e prioridad cu el a pidi pa e ley aki lo wordo trata urgentemente.
Sra. Wyatt-Ras ta bisa cu esaki ta posibel. E ta un ley cu nan a yega di papia hopi riba dje, te hasta nan a sinta cu minister, caminda den cada reunion e miembronan di Parlamento a haya informacion. E ta un factor cu ta haci e situacion aki diferente pa cu e Ley di Citgo.
Di otro banda e ta considerando cu e ley aki ta uno urgente, ya cu e ta un ley cu gran parti di comunidad ta warda riba dje, specialmente e hendenan cu actualmente ta desemplea. “E ta un ley cu lo pone pan ariba mesa di nos ciudadanonan.”
Polemica
Pa aclaria e polemica rond di e accesibilidad pa saca copia di e contract cu Citgo, presidente di parlamento ta bisa cu gobierno mes a dicidi di manda e documento aki, prome cu e deliberacion riba e ley menciona lo tuma luga den parlamento otro siman.
Sra. Wyatt-Ras a señala cu normalmente ta riba e dia mes di e reunion publico na Parlamento, nan ta haya e tipo di documentonan aki. E por bisa esaki cu propiedad, a base di su mesun experiencia di 15 aña den parlamento. Sinembargo e ta haya cu awor cu gobierno a dicidi di entrega e documentonan aki algun dia prome di e reunion publico pa asina tur miembro di parlamento sin excepcion por sinta y lesa nan, ta wordo lansa e tipo di criticanan aki.
Vigilancia riba documentonan
Otro critica tin di haber riba e denuncia cu e lider di MEP a lansa ya cu e ta haya cu e documentonan relaciona cu Citgo ta bou vigilancia di e coordinadornan di gobierno.
Riba e punto aki, sra. Wyatt-Ras a relata cu considerando cu parlamento no tin personal pa keda henter dia, a dicidi cu personal di minister ta bin sinta den e biblioteca di parlamento pa check cu e parlamentarionan e documentonan aki, ya cu nan no mag di saca copia di dje. E no ta algo excepcional, den sentido cu un documento asina, mescos cu den sala di parlamento, nan no mag di copia of saca potret di dje. Nan por skirbi full over e documentonan of haci anotacion di dje si nan kier, pero nan no mag di reproduci e documento original, e ta splica. “E ta e mesun regla cu e ta conta ora cu nan ta aki aden.”
Di otro banda e ta haya cu si parlamentarionan no ta gusta pa tin presencia di personal di minister den biblioteca di parlamento, ya cu parlamento mes no tin personal pa keda henter dia, pues nan mes por evalua pa laga minister en cuestion bay bek cu tur e documentonan aki, te ora cu e reunion publico lo tuma luga, ya cu esey ta e manera di traha normalmente.
Pero en opcion aki –segun sra. Wyatt-Ras- tampoco ta bon pa esunnan cu ta lansa criticanan, ya cu nan ta hay’e hopi drastico. “Aworaki ami no ta compronde kico nan kier”, e ta bisa.
Considerando e urgencia pa trata e ley aki, parlamento mester percura pa diahuebs awor nan por manda nan preguntanan pa Gobierno. Diabierna awor nan lo trata e relato cu Parlamento ta bay traha di nan preguntanan den un reunion di Comision Central. Si minister ta cumpli pa manda e contestanan mas pronto posibel, nan lo trata e ley aki dialuna awor caba. Gobierno a scoge pa contesta cierto preguntanan por escrito, pero tambe nan por contesta gran parti di nan verbalmente.
