Un suma di 510 florin pa daño di perhuicio y algo mas cu 3100 florin na gastonan. Esaki ta locual e matutino Awe Mainta mester paga e fuente online NoticiaCla despues cu nan a perde e caso di plagio.
NoticiaCla a entama e caso despues cu Awe Mainta a copia e articulo ‘Agencia di a auto demanda pa representa Porche ilegal’ y publica esaki sin permiso of mencion di e fuente. E matutino tambe a copia e potret sin permiso. Segun e doño di NoticiaCla Tito Lacle, esaki ta un violacion di e derecho di autor y el a pidi un suma pa daño di perhuicio di 7500 florin.
Den su defensa, asina por lesa den e veredicto, Awe Mainta a bisa cu nan no tabata sa cu e derecho di autor ta conta pero hasta a nenga tambe cu nan a copia e articulo y potret. Sinembargo hues dicta cu por mira cu e texto ta copia literalmente. Banda di esaki sr. Lacle a presenta evidencia cu e tabata e unico periodista presente durante e caso riba e agencia di auto. Y el a prueba cu el a saca e potret. E ultimo Awe Mainta no a desmenti.
Importante pa otro fuentenan di noticia: hues ta enfatisa cu Awe Mainta no tin rason ora nan a defende cu pa noticia e ley di derecho di autor no ta conta. E articulo concerni tabata un relato di un caso den corte, segun hues, y no ta trata di echonan. Segun ley den e caso cu kier uza noticia di otro fuente, mester menciona e fuente aki tambe. E caso aki tambe ta mustra cu e ley di derecho di autor ta anticua. Hues a remarca cu e ley no ta duna mucho instrumento pa aplica e derecho. Banda di esaki hues a uza e pagonan na Hulanda pa trabou di periodismo como referencia pa determina e suma di daño. Y asina yega na un suma hopi mas abou cu NoticiaCla a exigi.
No ta prome biaha cu NoticiaCla ta keha cu nan a copia noticia sin menciona e fuente. Varios biaha e fuente a mustra esaki tambe publicamente.
