Na final di februari a tuma luga tratamento di e caso di ontneming cu Ministerio Publico (OM) a cuminsa contra e sospechoso, ex parlamentario y minister Benny Sevinger, den e investigacion Avestrus.
Den e caso aki OM a exigi e suma di 900 mil florin como compensacion pa e supuesto beneficionan financiero cu e sospechoso a ricibi di manera ilegal di e crimennan pa cual el a ser condena den apelacion di caso Avestruz tambe.
OM a splica cu e capital obteni di manera ilegal ta inclui entre otro, donacionnan cu a ser duna na su persona y tambe sumanan haya di manera inexplicabel.
Na salida for di corte Sevinger, ken tabata compaña pa su famia, incluyendo su yiu muhe Stephany Sevinger ken ta actualmente parlamentario pa fraccion AVP, a duna declaracion na Telearuba y a splica cu manera ta conoci e caso Avestruz ta andando y di caso aki OM ta indica cu tin regalonan, sumanan financiero cu el a ricibi cual nan ta pone un suma na dje. Di esaki nan a cuminsa e caso di ontneming contra dje cu e meta pa kita e suma indica for di dje.
Sevinger a indica cu investigacion di OM, cu ta bisa cu e tin tres cas na Miami, condominium na Aruba, cuenta di banco na Corsou, Panama y Merca caminda e placa ilegal ta bay, no ta corecto, y a remarca cu e caso aki no ta bay tocante e acusacionnan cu nan tin den su contra, cu el a haya placa ilegal, pero cu e ta bay over di un persecucion politico den su contra.
