Despues cu a bira conoci cu Gabinete AVP-FUTURO ta cla pa huramenta diabierna (mañan) mainta, ayera tardi Parlamento di Aruba a aproba e carta di credencial di e parlamentarionan nobo. Esaki tabata e ultimo reunion di Gerlien Croes como presidente di parlamento ya cu diabierna (mañan) mainta e ta huramenta como minister.
E parlamentarionan Carlos Bermudez (AVP), Marlon Sneek (AVP), Otami Tomasia (AVP), Muzaninn Wever (FUTURO) y Ruthlyn Lindor (FUTURO) lo huramenta dilanti Gobernador di Aruba SE Alfonso Boekhoudt awe mainta na e Cas Ceremonial.
Parlmentario Jonathan Hart (AVP) lo huramenta diabierna (mañan) mainta y despues di huramentacion di parlamentario Hart, Gobernador di Aruba lo huramenta e seis candidatonan pa minister, Mike Eman, Arthur Dowers, Mervin Wyatt-Ras, Wendrick Cicilia di AVP, y Gerlien Croes y Geoffrey Wever pa partido FUTURO.. Esaki tambe lo tuma lugar na Cas Ceremonial.
Un candidato di minister di no lo huramenta ta Mike de Meza (AVP) pa motibo cu a encontra problema cu su proceso di screening den Departamento di Impuesto. Mientras esaki no ta keda resolvi, AVP no a indica ken lo bira su minister pa Infrastructura, Energia y Telecomunicacion.
