Ayera mainta, Departamento di Salud Publico a ofrece informacion riba loke ta trata e ‘Vacunathon Youth Edition’ cu lo tuma luga awe henter dia na Centro Deportivo Libertador Betico Croes na Santa Cruz.
Jurette Croes PR di e departamento a splica cu e actividad aki ta enfoca riba muchanan cu tin 12 aña bay ariba, el a splica cu siman pasa Departamento di Salud Publico di Aruba a haya e autorisacion di Hulanda pa cuminsa vacuna tambe e muchanan den e edadnan aki.
Croes a señala cu den un siman so te ayera tabatin 732 mucha menor di 18 aña cu a keda vacuna na unda el a sigura cu “mayornan tabata den espera di e oportunidad aki pa por proteha nan muchanan tambe”, mirando cu e diferente variantenan di Covid-19 ta afectando muchanan y aworaki ta temporada di vakantie.
Dr. Wilmer Salazar a trece dilanti cu den ultimo lunanan nan ta mira na nivel mundial rapportnan medico cu edad di infeccion pa Covid-19 ta bahando, antes tabata regarda na esunnan cu tin un edad avansa y cu tabatin algun di problemanan di complicacion pero cu na e momentonan aki nan ta mirando un aumento drastico di hende hoben di 12 aña bayendo ariba y cu esey ta creando un situacion basta preocupante, pa motibo di mayor ocupacion di cama pa hospitalisacion, mayor consecuencianan den nan salud, complicacionnan y hasta morto.
El a sigura cu esey por ta pa motibo di e variantenan cu ta surgiendo awor rond di mundo y esunnan cu ainda no a keda vacuna cu ta mas suceptibel pa haya un infeccion cu complicacion.
Den hende mas abou di 12 aña, segun Salazar a indica cu antes ora un hoben tabata keda infecta cu Covid-19 e no por a haya mas problemanan den su salud cu casonan asintomatico, na e momentonan aki ta mustra cu esunnan cu ta haya infeccion leve of sin sintomanan lo por tin consecuencianan despues cu e ta pasa su infeccion.
Esey kiermen cu e por keda cu algun problemanan den su salud cu lo por crea limitacionnan den su bida diario”, Salazar a sigura.
Mirando esaki, Pfizer a aproba un vacuna pa muchanan entre 12 pa 15 aña pa asina wak con su efecto di proteccion y siguridad ta, e resultado segun Salazar a expresa tabata hopi bon pa motibo cu nan a logra di protege e muchanan contra Covid-19 y ademas di esey evita complicacionnan of hospitalisacion.
Awe manera a keda menciona, muchanan cu tin 12 aña bay ariba por bay cu nan mayornan na Centro Libertador Betico Croes na Santa Cruz for di 9or di mainta te cu 4or di atardi pa asina haya e prome dosis di e vacuna y tres siman despues lo por haya e di dos dosis.
Mayornan cu no a keda vacuna ainda, nan por asisti cu nan yiu pa nan por vacuna tambe, mesun manera a keda informa cu personanan cu no tin status legal riba isla y nan yiunan tambe por acerca te e centro deportivo aki y presenta nan paspoort, turistanan ta esunnan cu no mag di vacuna.
