Awe lo tuma luga un marcha simbolico na nomber di hoben Luisangel Figueroa

Ahaiza Flores, mama di e hoben Luisangel Figueroa, conoci como “DJ Louisville”, kende a fayece na luna di october a comenta cu e marcha simbolico aki tin un obhetivo so: Haya sa kico a pasa cu yiu.

Comunidad di Aruba a conoce e tristo noticia e dia 17 di october unda cu varios medio di comunicacion tabata reporta e morto di un hoben di 20 aña den circunstancianan cu te ainda no a ser aclaria, cu autoridadnan no por duna un contesta precies di kico a sucede den e centro comercial Paseo Herencia, luga na unda Luisangel a haya su morto.

Reportero di Bon Dia Aruba a tuma contacto cu Anahiza Flores unda cu el a conta cu awe for 4or di atardi su persona hunto cu su famianan, amigonan, personanan cercano na Luisangel y comunidad invita lo cana for di Plasa di Turismo te Parlamento pa asina di un manera simbolico y pacifico por recorda e hoben DJ cu a muri di manera inespera.

“Esaki no ta un manifestacion; e ta un marcha simbolico. Nos ta haci esaki diasabra y mañan diadomingo nos tin un anochi di oracion na mi cas, nos no ta bay entrega nada na Parlamento, nos ta bay cana cu tur esunnan cu ta apoya nos”, Flores a bisa.

Flores a splica cu tabatin basta movemento riba rednan social den e siman aki unda algun publicacion ta pidi pa husticia y pa e caso di Luisangel no keda impune. Tambe el a pidi un permiso na Cuerpo di Polis di Aruba pa haci un marcha simbolico awe diasabra 15 di januari unda el a haya su aprobacion.

Segun el a indica, Ministerio Publico a tuma contacto cune par di dia pasa, pero pa via di e publicacionnan aki y no pa duna mas informacion tocante e caso. Dia 17 di januari ta cumpli tres luna desde cu e suceso aki a tuma luga, unda Flores a bisa cu for di comienso autoridadnan tabatin supuesto señalnan cu Luisangel a mata su mes. Pero “esey ta algo straño, pasobra ban bisa cu e mama no a ripara cierto cosnan di su yiu,. pero esey no ta mi caso. Mi ta un mama cu semper tabata cu mi yiu y duna support pa loke tabata kier haci y traha cu tabata DJ”, el a menciona.

Ademas di esey, el a trece cu aunke su yiu tabatin 20 aña, e no tabata un mucha pero tampoco tabata un homber, e tabata studia y traha como DJ, “algo cu mi a apoya di mi yiu semper, unico cos cu e tabata kier ta pa e traha como DJ”.

Asina mes, Flores tambe a comenta cu no ta asina cu e kier pa Ministerio Publico duna un informacion cu no ta corecto door di e presion cu nan ta poniendo. “No ta un presion, loke mi kier ta pa tur hende sa, ta cu mi ta un mama cu e dos biaha cu ma bay Ministerio Publico y Recherche nan a bisa mi cu nan no tin nada”.

Na momento cu a haya e curpa di Luisangel, segun Flores a indica, el a ser haya di un manera masha straño. “E curpa di mi yiu no tin mas fractura cu esun di su cabes y su custia cu a kibra door di e reanimacion. Anto tin hopi cos y tin hopi pregunta cu mi tin pa nan, nan no ta tende y nan no ta scucha mi, esey ta mi preocupacion”.

Pa finalisa Flores a trece dilanti cu loke nan kier ta pa e caso no keda drumi manera otronan cu a tuma luga na Aruba, pa nan haya un responde, “mi unico proposito ta pa sa kico a pasa cu mi yiu, esey ta mi unico proposito y esey ta un derecho cu mi tin”.

Ministerio Publico diahuebs ultimo a manda un comunicado di e caso aki na medionan di comunicacion, na unda nan ta indica cu generalmente Ministerio Publico no ta bisa nada den casonan asina unda no tin un sospechoso deteni ainda.

“Pero den e caso aki ta otro, mirando cu e team investigativo a bin ripara cu riba social media tin hopi informacion y noticianan incorecto circulando tocante e caso. E informacionnan y noticianan aki, cu ta wordo presenta como berdadero, en realidad ta resulta di no ta berdad”, e comunicado ta señala.

Ademas, nan ta expresa cu por ehempel, tin un persona cu a publica un video tocante e supuesto hechonan rond di morto di Figueroa, y cu despues a wordo yama pa Polis y scucha como testigo, unda el a bin na admiti cu el a inventa tur esaki.

“Mester ta duidelijk na un y tur cu esaki ta costa hopi capacidad di Polis y ta bay a costo di e adelanto y conclusion di e investigacion. Ademas e rumornan y noticianan falso aki riba social media ta innecesariamente causa mas dolor ainda cerca famia di e difunto”.

Polis ta spera di completa e investigacion na luna di maart, mientrastanto e famia lo wordo informa tocante e resultadonan, despues di cual por tuma decisionnan.

Asina mes minister di Husticia, Rocco Tjon a ofrece un entrevista na otro medio di comunicacion e dia di ayera unda cu el a menciona cu “esaki ta keda un caso hopi lamentabel na unda e casonan aki ta tuma su tempo tambe pa investiga. Loke mi por bisa di e caso sin bay den detaye, pasobra mi no sa tur e detaye tampoco, pasobra como minister bo no kier mete den un investigacion tampoco, ta cu tin un ekipo investigativo cu ta analisa tur e informacion cu ta drenta y a traves di esaki nan ta haci un analisis pa wak con nan ta sigui” Tjon a manifesta.

Tambe el a trece dilanti cu, a traves di e comunicado di prensa di Ministerio Publico, Procurador General tambe a enfatisa cu ta hopi lamentabel cu riba rednan social tin personanan cu ta publica informacion incorecto pa dilanti, esaki ta condenabel pa diferente motibonan como causa hopi dolor cerca e famia y tambe ta obstaculisa un investigacion.

Tocante e personanan cu a duna un declaracion na instancianan cu a resulta di ta falso, a bin dilanti e pregunta si esaki no ta un acto castigabel pa ley, pa loke Tjon a expresa cu esey ta depende di e tipo di informacion y si ta haci’e di manera oficial of riba rednan social, “obviamente bo no por bay duna un declaracion falso, esey ta diferente si bo ta djis publica riba un red social”, el a enfatisa. Tur informacion y tur paso cu Polis tuma den e caso aki ta wordo escrutina door di Ministerio Publico.