Mañan diabierna durante e actividadnan semanal cu ta tuma lugar anochi dilanti Djiespie’s Place na final di Caya Grandi, lo tin un ceremonia special ora cu ta bay ofrece un reconocemento postumo na un gran persona.

E reconocemento postumo ta bay na e gran Etty Toppenberg (d.f.m.), como cu e tabata e persona primordial cu a bin cu e idea pa e luga conoci aki tene un encuentro musical tur diabierna anochi, cu ta converti su mes den un ambiente bailabel.

Ademas di esaki, varios persona ta expresando nan deseo pa e plasa cu ta dilanti e luga aki cambia di nomber y bira Plaza Etty Toppenberg.

Igor Hasham di e grupo musical ‘Nos Cu Nos’ ta toca regularmente tur diabierna anochi y ta mira con en general, e hendenan di edad grandi no tin realmente otro luga pa bay y awor porfin riba diabierna anochi nan a haya un luga pa sea sinta, gosa, y hasta rek pia un poco bao di e tononan musical.

E grupo Nos Cu Nos lo bay ta bay ta animando y segun Hasham nan ta bin cu un repertorio cu ta cay na agrado di e ciudadanonan aki.

Tempo pasa Etty Toppenberg a yega na e luga aki y a pidi permiso pa e sinta dilanti e negoshi y cuminsa toca cu su guitara pa deleita e clientenany esnan canando den Caya Grandi, di e forma ey e ambiente a start, cu djis un amplifier chikito.  Despues di dos siman, ya nan a haya nan ta saca stul pafo pa acomoda publico cu a cuminsa aglomera pa scucha Etty y su guitara.  E tabata algo chikito cu a bira grandi, y a pone ambiente dushi cu musica Arubiano, Antiyano, y logico e musicanan cu ta trend tambe.

Pa e motibo aki, mañan e grupo Nos Cu Nos tin planea di presenta algun cancion cu Etty Toppenberg a haci famoso, incluyendo esun cu el a participa hunto cu Trio Huasteca den e famoso evento internacional di Festival OTI.

A prepara dos placa special pa haci entrega e anochi aki, uno ta na casa di Etty Toppenberg pa su gran iniciativa y despues señora Toppenberg lo entrega e placa aki na viuda di Djiespie’s pa asina colge paden di e lugar.

Nan ta invita comunidad pa presencia e momento aki y duna un reconocemento mereci na Etty Toppenberg.