“Venezuela Alza la Voz…” esaki ta e slogan di e Consulta Popular organisa pa e grupo di oposicion na Venezuela, tambe na Aruba y rond mundo.

Aunke for di dia 7 di december ultimo e consulta aki a cuminsa di forma virtual, awe e Venezolanonan estableci na Aruba tin oportunidad pa lanta nan bos den 11 centro di consulta popular, pero teniendo cuenta cu tur regla y protocol exigi pa departamento di Salubridad Publico (DVG). E centro aki ta disponibel pa esnan cu no por haci uzo via virtual di e derecho democratico aki.

Centronan y rekisitonan

Un miembro activo di e grupo di oposicion di Venezolano na Aruba, Sra. Laura Luces a declara na Bon Dia Aruba cu e centronan lo ta habri awe for di 10’or di mainta te cu 5’or atardi. Pero si tin mester nan lo cera mas laat, basta cu e Venezolanonan estableci na Aruba por participa activamente den e consulta popular aki.

Logisticamente nan a bin cu diferente centro di consulta popular pa e Venezolanonan por realisa e ehercicio democratico aki mas safe debi na e situacion di e pandemia di Covid-19. Nan kier evita aglomeracion di hende. Tambe nan a bin cu un orario mas largo. Tur hende mester bisti nan tapa boca y tambe mantene nan distancia social.

E persona mester ta Venezolano mayor cu 18 aña. Mester tin cedula of paspoort di Venezuela vigente of venci. Sra. Laura Luces a bisa cu no ta importa bo statuut. E Venezolanonan di turismo na Aruba of esnan cu nan situacion migratorio no ta na ordo por participa tambe. Esaki ta e centronan di consulta popular:

BERLONI: Boegoeroi 85, Noord.

BOCHINCHA: Rockefellerstraat 8, Oranjestad.

CHOCOGLAM: Boegoeroi 77B, Noord.

CARIBEAN PRINT: Bubali 107 E, Locales 1 y 2, Noord

FRUTERÍA PARADERA: RTE4 (Av principal de Paradera).

LENIN: Seroe Blanco 78N, Noord.

MASAGO ARUBA: Rockefellerstraat 8, #5, Oranjestad.

ROSA SNACKS: Pos Chikito.

RESIDENCIAS DON VICENTE: Kwarstsstraat 8, Oranjestad.

RUBIO TRADING: Watapanastraat 5, Pontón

SHOCCO SNACK : Schollandstraad/ Pos Abau.

Pa participa via digital te awe dia 12 di december mester download den bo celular inteligente e app VOATZ via Google Play of App Store. Igualmente via app Telegram bo por haci’e. Bo mester skirbi: consulta por vzla. Tambe via bo computer bo por haci’e directamente riba e website: www.consultaporvzla.com

Ora bo ta haci e proceso digital bo ta haya un codigo unico y intransferibel di participacion cu ta bon pa bo tin’e bon skirbi. Esaki pa percura di duna proteccion na tur bo informacion. Tur informacion di e consulta popular aki ta uno totalmente confidencial, asina Sra. Luces a laga sa na e matutino aki.

Nan ta spera cu por lo menos 5 mil Venezolano na Aruba por expresa su mes nan disgusto contra e regimen di Maduro pa medio di e consulta popular aki. El a bin cu e cifra aki teniendo na cuenta e delaster actividad di e consulta popular cu nan a organisa na Aruba dia 16 di juli 2017 na Cas di Cultura.

El a bisa cu e consulta aki a bira un señal evidente pa presidente interino, Juan Guaidó, por asumi e poder na Venezuela. Pero tambe e comunidad internacional a lanta y nan a bin cu un cantidad di sancion contra e regimen Chavista di Maduro.

Actualmente nan no tin un cifra exacto cuanto Venezolanonan tin na Aruba. Pero debi na e situacion cu Venezuela ta pasando aden pa consecuencia di e regimen di Nicolas Maduro, mas cu 5 miyon di Venezolano a bandona nan pais natal.

Actualmente hopi Venezolano a bin Aruba y un gran cantidad di nan ta ilegal, kiermen nan statuut migratorio no ta na ordo. E ultimo eleccion a mustra cu tabatin alrededor di 1.500 Venezolano registra den e censo electoral di nan pais pa vota na Aruba. Pero algun di nan a bandona Aruba caba of otronan a renuncia na nan nacionalidad, ora cu nan a adopta e nacionalidad Hulandes.

Consulta

E obhetivo principal tras di e consulta popular aki ta denuncia dilanti e comunidad internacional y tambe na Venezuela mes cu e pueblo Venezolano den su gran mayoria no ta bay di acuerdo cu e regimen di Maduro. Tampoco cu eleccion cu ta wordo considera falso cu a tuma luga diadomingo ultimo. “Mi tin cu bisa cu e tabata un fracaso absoluto. Nan a aumenta e cifra bisando cu tin un 16%,” segun Sra. Laura Luces.

El a recorda cu durante eleccion ultimo unda fraude a sosode, e mesun empresa Smartmatic a reconoce durante un conferencia di presa na London cu e cifra cu nan a duna di casi 10 miyon no tabata corecto, sino cu e tabata menos cu esey. E tempo aya oposicion a kere cu solamente un miyon y mey di hende a vota e biaha ey.

P’esey e consulta di awe tin tres pregunta so cu ta bisa textualmente na Spaño asina:

1) ¿Exige usted el cese de la usurpación de la presidencia de parte de Nicolás Maduro y convoca la realización de elecciones presidenciales y parlamentarias libres, justas y verificables?

2) ¿Rechaza usted el evento del 6 de diciembre organizado por el régimen de Nicolás Maduro y solicita a la comunidad internacional su desconocimiento?

3) ¿Ordena usted adelantar las gestiones necesarias ante la comunidad internacional para activar la cooperación, acompañamiento y asistencia que permitan rescatar nuestra democracia, atender la crisis humanitaria y proteger al pueblo de los crímenes de lesa humanidad?

Dicon mester participa

Segun Sra. Luces, si Venezuela su pueblo no ta sigui lanta nan bos -apesar cu e regimen Madurista t’ey keto bay- nan lo termina mescos cu Cuba.

El a bisa cu e dictadura Cubano a termina cu tur opositor, ya cu na Cuba e opositornan ta casi nulo. E diferencia cu Venezuela ta cu na Cuba e opositornan a wordo fusila. Pero awendia e ta haya cu e paisnan considera como “civilisa’ a lubida con teribel e dictadura ta cu e pueblo Cubano.

“Dicon ma bisa cu nan a lubida loke a sosode na Cuba? Nos por mira cu tin vuelo di tur pais cu ta bay Cuba. Ya caba tin empresa internacional na Cuba. Tambe el a bira un paraiso turistico na nivel internacional, lubidando loke a sosode pa establece e regimen na Cuba,” el a expresa.

 

Mientras cu awendia na Venezuela e opositornan ta wordo poni preso of tortura. Of nan ta exilia of refugia den otro pais pa evita di cay den man di e regimen di Maduro. E no kier pa Venezuela 61 aña despues ta sigui e mesun caminda di Cuba. Tanto asina cu e mesun ex presidente Mericano Obama y Papa Francisco no a bay contra e regimen Castrista.

P’esey na final, Sra. Laura Luces como miembro di e grupo di oposicion di Venezuela na Aruba ta haci un yamado pa tur Venezolano mayor di 18 aña por participa den e consulta popular aki, ya sea via virtual of presencial den e 11 centronan di consulta rond di Aruba.

Sra. Luces ta consciente cu ta existi cierto skepticismo cerca e comunidad Venezolano. E ta haya cu e tipo di actividad democratico aki ta permiti pa e Venezolanonan por lanta nan bos contra e regimen di Maduro. El a bisa na Spaño: “Mientras tengamos un aliento debemos seguir luchando por una Venezuela libre. También debemos demostrar ante la comunidad internacional que los venezolanos no queremos a este régimen criminal, pero que solo no podemos. Realmente necesitamos ayuda, esto no es un problema de Venezuela sola, sino de toda la región. Voy más allá, de todo el mundo…”